ئێران ناسنامەی ئەو دوو خۆکوژەی ئاشکراکرد کە هێرشیان کردبووە سەر کرمان

SNN

دوای تێپەڕبوونی چەند رۆژێک بەسەر دوو تەقینەوەکەی پارێزگای کرمان لە ئێران، وەزیری ناوخۆی ئێران ناسنامەی دوو خۆکوژەکەیان ئاشکراکرد، وتی “تاجیکین”.

ئەمڕۆ چوارشەممە 10ی کانوونی دووەم، ئەحمەد وەحیدی، وەزیری ناخۆی ئێران، لە راگەیەنراوێکدا ناسنامەی ئەو دوو خۆکوژەی ئاشکراکرد، کە چەند رۆژێک لەمەوبەر لە شاری کرمان لە باشووری رۆژهەڵاتی ئەو وڵاتە هێرشە تیرۆریستییەکەیان ئەنجام دا.

لە راگەیەنراوەکەدا هاتووە، ” یەکێک لە خۆکوژەکان تاجیکییە، ئەگەری زۆریش هەیە خۆکوژی دووەمیش تاجیکی بێت”.

ئاماژەی بەوەشکرد، “هەندێک لەو سەرچاوانەی پەیوەندییان بە هێرشە تیرۆریستییەکەوە هەبووە، دەستگیرکراون”، جەختیشیکردەوە، دەزگا ئەمنییەکان دەستیان بەسەر کەلوپەلی دیکەدا گرتووە کە لەبەردەستی تیرۆریستاندا بوون.

ئەمە لە کاتێکدایە پێشتر،مەهدی بەخشی، داواکاری گشتی پارێزگای کرمان ئاشکرایکردبوو، لەسەر هەمان دۆسییە 32 کەسیان دەستگیرکردووە و لە ئێستادا لەژێر لێکۆڵینەوەدان.

جێگەی ئاماژەیە، لە 3ی کانوونی دووەمی 2024دا لەکاتی بەڕێوەچوونی مەراسیمی یادکردنەوەی ساڵرۆژی کوشتنی قاسم سولەیمانی فەرماندەی فەیلەقی قودسی ئێرانی لە شاری کرمان دوو تەقینەوە روویاندا.

هاوکات، رۆژێک دوای رووداوەکە 4ی کانوونی دووەم، رێکخراوی چەکداری داعش بەرپرسیاریەتی خۆی لە دوو تەقینەوەکەی پارێزگای کرمان راگەیاند و گوتی، “لەلایەن دوو خۆکوژی ئێمەوە کراوە”.

لە ئەنجامی ئەو دوو تەقینەوەیەدا ژمارەی کوژراوان گەیشتە 91 کەس، هەر لەو رووداوەدا 284 کەس برینداربوون کە 11 کەسیان باری تەندروستییان ناجێگیرە.