مەسرور بارزانی لەبارەی هێرشەکانی هەولێرەوە لە سویسراوە پەیامێک بڵاودەکاتەوە

SNN

سەرۆکی حکومەتی ھەرێم لە ئێستادا بۆ بەشداریکردن لە داڤۆس لە سویسرایە، لەو وڵاتەوە بەهۆی هێرشەکەی سەر هەولێر پەیامێکی بڵاوکلردووەتەوە، داوا لە حکومەتی فیدراڵی و کۆمەڵگەی نێودەوڵەتی دەکات لەبەرامبەر ھێرشەکەی سەر ھەولێر ھەڵوێستی توندیان ھەبێت و لەسەر ئەو ستەمکاریەی بەرامبەر بە خەڵکی کوردستان دەکرێت بێنە دەنگ.

بەیانی ئەمڕۆ سێشەممە، مەسرور بارزانی، سەرۆکی حکومەتی ھەرێم لەپەیامێکدا ئیدانەی ھێرشەکەی سەر ھەولێری کرد و ئاماژەی بەوەشکرد، ھێرشەکەی ھەولێر بێ پاساوە و شەھید و برینداری لێکەوتووەتەوە، بۆیەش داوا لە حکومەتی فیدراڵی دەکات ھەڵوێستی توندی ھەبێت بەرامبەر بەو پێشێلکاریەی دەکرێتە سەر سەروەریی عێراق و بەتایبەتی ھەرێمی کوردستان.

ئاماژەی بەوەکردووە، داوا لە کۆمەڵگەی نێودەوڵەتی دەکات لە سەر ئەو ستەمکارییەی بەرامبەر بە خەڵکی کوردستان دەکرێت بێنە دەنگ.

ئەوەشی خستووەتە ڕوو، لە رۆژانی داھاتوودا، لەگەڵ کۆمەڵگەی نێودەوڵەتی لە پەیوەندیی بەردەوامدا دەبن لە پێناو کۆتاییھێنان بەو ھێرشانەی دەکرێنە سەر خەڵکی بێتاوانی کوردستان.