بڕیارە سەرۆكی حكومەت كارگەیەك لە هەڵەبجە بكاتەوە كە ماوەی شەش ساڵە كراوەتەوە

SNN-عەلی حەمە سەعید

وابڕیارە سبەی پێنج شەممە بۆ یەكەم جار لەدوای بوون بە سەرۆكی حكومەت مەسروبارزانیسەردانی پارێزگای هەڵەبجە بكات و لەسەردانەكەیشیدا بەردی بناغەی پردی تووەقوت و دەستكردن بە پێدانی تابلۆی ئۆتۆمبێل بەناوی هەڵەبجەوە بخاتە بواری جێبەجێكردنەوە، هاوكات بڕیاریشە سەردانی كارگەیەك بكات كە ماوەی شەش ساڵە كارگەكە كراوەتەوە بەرهەمی هەیە.

بەگوێرەی ئەو زانیارییانەی كە دەستی SNNكەوتوون وابڕیارە سبەی پێنج شەممە 22/2/2024 بۆ یەكەمجار مەسروبارزانی سەرۆكی حكومەتی هەرێم سەردانی پارێزگای هەڵەبجە بكات، ئەوەش یەكەم سەردانی ناوبراوە بۆ ئەو پارێزگایە لەدوای بوونی بە سەرۆكی حكومەتی هەرێم، هاوكات لەسەردانەكەیدا بەردی بناغەی پردی تووەقوت دادەنێت كە زیاد لە 10 ساڵە هاووڵاتیانی هەڵەبجە لەچاوەڕوانی جێبەجێكردنی ئەو پرۆژەیەدان بەڵام بەبیانووی نەبوونی بودجەوە تا ئێستا جێبەجێنەكراوە.

ئاماژەبەوەشكراوە، هەر لە سەردانەكەیدا وابڕیارە كە لەبەڕێوەبەرایەتی هاتووچۆی پارێزگای هەڵەبجە ئامێری تایبەت بە دروستكردن و پێدانی تابلۆی ئۆتۆمبێل بە ناوی هەڵەبجەوە بخاتە كارو ڕادەستی بەڕیوەبەرایەتی هاتووچۆی پاریزگای هەڵەبجە بكرێت و هاووڵاتیانیش دەتوانن تابلۆی ئۆتۆمبیلەكانیان بەناوی هەڵەبجەوە بكەن.

SNNئەوەشی زانیوە كە لەسەردانەكەی سبەینێی سەرۆكی حكومەت، سەردانی كارگەی ڕۆنی زەیتی راسان بكات و هاوكات پرۆژەی كیلگەی بەخیوكردنی ئاژەڵ و بەرهەمهینانی شیرەمەنی بەسەر بكاتەوە، لەكاتیكدا كارگەی ڕۆنی زەیتوی راسان ماوەی شەش ساڵە كراوەتەوە و بەرهەمەكانی لەبازارەكانی هەریمی كوردستان و عێراق و تەنانەت وڵاتانی دەرەوەش بەردەستە وابڕیارە سبەی سەرۆكی حكومەت ئەو كارگەیە بكاتەوە.