“بڕیاره‌كه‌ى دادگاى فیدراڵى، هه‌ولێر و به‌غدا ناچار ده‌كات به دابینكردنى مووچه”
دراوى 25 هه‌زار دینارى عێراق | فۆتۆ: SNN
SNN
ئه‌ندامێكى ئه‌نجوومه‌نى نوێنه‌رانى عێراق ئاشكرایده‌كات، بڕیاره‌كه‌ى دادگاى فیدراڵى، هه‌ولێر و به‌غدا ناچار ده‌كات به دابینكردنى مووچه ته‌نانه‌ت ئه‌گه‌ر نه‌شگه‌نه رێككه‌وتن، ده‌شڵێت: “به‌پێى بڕیاره‌كه فه‌رمانگه‌كانى هه‌رێم ده‌توانن به‌بێ گه‌ڕانه‌وه بۆ حكومه‌تى هه‌رێم خۆیان لیست بنێرن بۆ وه‌زاره‌تى دارایی عێراق”.
رۆژى چوارشه‌ممه 21ى شوبات، دواى 11 جار كۆبوونه‌وه و دواخستنى دادگاییه‌كه، دادگاى فیدراڵى عێراق بڕیاریدا له‌سه‌ر پابه‌ندكردنى هه‌ولێر و به‌غدا به دابینكردنى پاره‌ى مووچه‌ى مووچه‌خۆرانى هه‌رێم و دابه‌شكردنى له‌ڕێگه‌ى بانكه فیدرڵیه‌كانه‌وه.
ئاسۆ فه‌ره‌یدون، ئه‌ندامى ئه‌نجوومه‌نى نوێنه‌رانى عێراق له‌و باره‌یه‌وه به SNNى راگه‌یاند، “بڕیاره‌كه‌ى دادگاى فیدراڵى له‌باره‌ى مووچه سێ خاڵى گرنگى تێدایه كه بریتیه له ناچاركردن حكومه‌تى هه‌رێم به راده‌ستكردنى داهاتى نه‌وتى و نانه‌وتى، ناچاركردنى به‌غدا به ناردنى پاره‌ى مووچه ته‌نانه‌ت ئه‌گه‌ر رێكیشنه‌كه‌وت. هاوكات، پێدانى مووچه له‌ڕێگه‌ى هه‌ژمارى بانكیه‌وه”.
وتیشى: “”به‌پێى بڕیاره‌كه فه‌رمانگه‌كانى هه‌رێم ده‌توانن به‌بێ گه‌ڕانه‌وه بۆ حكومه‌تى هه‌رێم خۆیان لیست بنێرن بۆ وه‌زاره‌تى دارایی عێراق و مووچه‌یان پێبدرێت”.
