” پێشوازی لە دیاركردنی ڕۆژی هەڵبژاردن دەكەین”

SNN-عەلی حەمە سەعید
وتەبێژی فەرمی یەكێتی نشتیمانی كوردستان ئاماژە بەوەدەكات ئێمە دەمێكە ئامادەی هەڵبژاردنی پەرلەمانی كوردستانین و پێشوازی لەو بڕیارەی سەرۆكایەتی هەرێم دەكەین بە دیاریكردنی وادەی هەڵبژاردنی پەرلەمان، جەختیش دەكاتەوە كە یەكێتی لەگەڵ بەستنی هەر هاوپەیمانییەتیەكدایە كە لەبەرژەوەندی گشتیدابێت.

سەعدی ئەحمەد پیرە، وتەبێژی فەرمی یەكێتی نشتیمانی كوردسنان بە SNNی ڕاگەیاند: دیاریكردنی ڕۆژی هەڵبژاردنی پەرلەمانی كوردستان لەلایەن سەرۆكایەتی هەرێمەوە هەنگاوێكی دڵخۆشكەرە بۆ ئەوەی هەرێمی كوردستان لەم چەقبەستووە سیاسییە ڕزگاری ببێت و دامەزراوە شەرعییەكان بەگەڕبخرێنەوە و بەكاری خۆیان هەستن، بۆیە ئێمە لەیەكێتی نشتیمانی كوردستان لەمێژە چاوەڕێی ڕۆژی هەڵبژاردنین و خۆشمان بۆ هەلبژاردن ئامادە كردووە و پیشوازی لێدەكەین.

ئاماژەی بەوەشكرد، لەگەڵ ئەوەی هێشتا زووە باس لە بەستنی هاوپەیمانییەتی بكرێت لەگەڵ هێزوو لایەنە سیاسییەكانی دیكە، بەڵام بەدڵنیاییەوە یەكێتی نشتیمانی كوردستان ئامادەیە بە بەستنی هاوپەیمانی لەگەڵ هێزوو لایەنە سیاسییەكانی دیكە بەمەرجێك ئەو هاوپەیمانییە لەبەرژەوەندی گشتیدا بێت و تەنها خزمەت بە لایەنێك یان چەند لایەنێكی دیاری كراو نەكات.

وتەبێژەكەی یەكێتی نشتیمانی كوردستان ئەوەشی خستەڕوو، مەڵبەندەكان و كۆمیتەو ئۆرگانە جیاوازەكانی یەكێتی ئەركی دیاركردنی كاندیدەكانی یەكێتیان لەسەر شانە و لە ڕۆژانی داهاتوودا دەستدەكرێت بە دیاریكردنی كاندیدەكان بۆ پەرلەمانی کوردستان.