” ئامادەین بۆ هەڵبژاردنی پەرلەمانی کوردستان وسەرخستنی پرۆسەکە”

عەلی حەمەسەعید-SNN

لەچوارچێوەی کاردانەوەکانی تایبەت بە دیاریکردنی ڕۆژی هەڵبژاردنی پەرلەمانی کوردستان، سەرۆکی پارتی سۆسیال دیموکراتی کوردستان جەخت لەوەدەکاتەوە کە پێشوازی لە بڕیارەکەی سەرۆکی هەرێم دەکەین و ئامادەین بۆ هەڵبژاردن و سەرخستنی پرۆسەکە.

لەڕاگەیەندراوێکی ( محەمەد حاجی مەحمود) سەرۆکی پارتی سۆسیال دیموکراتی کوردستان کە وێنەیەکی بۆ SNNنێردراوە و بەناوی پارتەکەیەوە بڵاوی کردووەتەوە ئەوەخراوەتەڕوو،پێشوازی لەبڕیاری سەرۆکی هەرێمی کوردستان دەکەم بە دیاریکردنی ڕۆژی 10ی حوزەیران بۆ ئەنجامدانی هەڵبژاردنی پەرلەمانی کوردستان، ئێمە وەکو پارتی سۆسیال دیموکراتی کوردستان وێڕای دەستخۆشیمان بۆ ئەم بڕیارە، ئامادەیی تەواومان هەیە بۆ بەشداریکردن و سەرخستنی پرۆسەکە.

ئاماژەی بەوەشکردووە، ئەم بڕیارە سەرەتای هەنگاونانە بەرەو دەرچوون لەو قەیرانە سیاسی و کارگێڕییەی هەرێمی کوردستان تێیکەوتووە، ئومێد ئەکەم هەموو لایەنە سیاسییەکان بەوپەڕی بەرپرسیارێتی نەتەوەیی و نشتمانییەوە هەوڵی دروستبەڕێوەچوون و سەرخستنی پرۆسەکە بدەن.

سەرۆکی پارتی سۆسیال دیموکراتی کوردستان ئەوەشی خستووەتەڕوو، خولی پەرلەمانی داهاتوو دەکەینە شوێنگەی هەوڵە یاسایی و کارگێڕییەکانمان بۆ زیاتر بەهێزکردنەوەی هەرێمی کوردستان و گێڕانەوەی مافی هەموو چین و توێژەکان و هاوڵاتیانی هەرێمی کوردستان.

ئەوەش لەکاتێکدایە کە ئەوپارتە ماوەی چەند مانگێکە ڕووبەڕووی کێشەی ناوخۆیی بووەتەوە و لەدواین کۆبوونەوەی مەکتەبی سیاسی ئەوحزبە بڕیاردرا کە لەئایندەیەکی نزیکدا کۆنگرەی هەشتەم ببەستن.