نوێترین زانیاری لەبارەی لێخۆشبوون لە باجی گومرگی بە مەبەستی هەرزانكردنی گۆشتی سوور

SNN-عەلی حەمە سەعید

نزیكەی مانگیگە نرخی گۆشتی سوور لە بازاڕەكانی هەرێم بەرز بوونەوەی بەرچاوی بەخۆیەوە بینیوە، هاوكات بەمەبەستی كەمكردنەوەی نرخی گۆشت حكومەتی عێراق بڕیاری لێخۆرشبوونی باجی گومرگی داوە بۆ هاوردەكردنی گۆشت و ئاڵ لەدەروازە سنوورییەكانەوە، لایەنە پەیوەندیدارەكانی هەرێمی كوردستانیش جەخت لەوەدەكەنەوە چاوەڕێی ئەنجومەنی وەزیرانن بۆ لابردنی باجی گومرگی بۆ هاوردەكردنی گۆشتی سور و ئاژەڵی زیندوو.

ساماڵ عەبدولڕەحمان، بەڕێوەبەری گشتیی گومرگی هەرێم بەSNNی ڕاگەیاند: تا ئێستا لەلایەن ئەنجومەنی وەزیران و وەزارەتی كشتوكاڵ وسەرچاوەكانی ئاو بە شێوەیەكی فەرمی هیچ بڕیارێكمان بە دەست نەگەیشتووە لەبارەی لێخۆشبوونی باجی گومرگی لە دەروازە سنوورییەكان، بۆیە چاوەڕوانی بڕیاری فەرمین لە ئەنجوومەنی وەزیران و وەزارەتی كشتوكاڵ بۆ جێبەجێكردنی بڕیاری لێخۆشبوونی باجی گومرگی بۆ هاوردەكردنی گۆشتی سوور و مریشك لە دەروازە سنوورییەكان.

ئاماژەی بەوەشكرد، هەر بڕیاریكە لەبەرژەوەندی هاووڵاتیاندا بێت و لەلایەن ئەنجومەنی وەزیران و هەر وەزارەتێكی دیكەوە ئاراستەمان بكرێت ئامادەین بە جێبەجێكردنی، بۆیە رێكارەكان بۆ دابەزاندنی نرخی گۆشتی سوور دەستیپێكردووە، بەڵام هێشتا بەفەرمی هیچ بڕیارێكمان بەدەست نەگەیشتووە.

وتەكانی بەڕێوەبەری گشتی گومرگی هەرێم لەكاتێكدایە كە بەمەبەستی كەمكردنەوەی نرخی گۆشتی سور لە بازاڕەكان حكومەتی عێراقی بڕیاریداوە بە لێخۆشبوونی گومرگی بۆ هاوردەكردنی ئاژەڵ، هاوكات وەزارەتی كشتوكاڵی عێراق رایگەیاند، لە دوای هاوردەكردنی یەكەم كاروانی ئەو 17 هەزار گوێرەكەیەی لە بەڕازیل و ئیكوادۆر و كۆڵۆمبیاوە هاوردە دەكرێن، نرخی گۆشتی سوور بۆ مانگی رەمەزان دادەبەزێت.