بزووتنەوەی حەماس لەبارەی راگرتنی جەنگ لە غەززە بەیاننامەیەکی بڵاوکردەوە
ژن و منداڵێک لە غەززە
SNN
بزووتنەوەی حەماس رایگەیاندووە، لە رێگەی نێوەندگیرییەکانەوە دانوستانەکان بۆ راگەیاندنی ئاگربەت لەگەڵ ئیسرائیل بەردەوامە، دەڵێت “بۆ ئەوەش نەرمیمان نواندووە”.
ئەمڕۆ چوارشەممە، 6ی ئازار، بزووتنەوەی حەماس بەیاننامەیەکیان بڵاوکردووەتەوە و ئاشکرایدەکەن، “بزووتنەوەی حەماس لە داواکارییەکانیدا نەرمی نواندووە بە ئامانجی ئەوەی بگەنە رێککەوتن بۆ ئەوەی بە تەواوی هێرشە دوژمنکارانەکانی ئیسرائیل لە کەرتی غەززە بوەستێنرێت”.
ئاماژە بەوەکراوە، “ئیسرائیل تائێستا خۆی دەدزێتەوە لە شایستەكانی ئەو رێككەوتنە، كە تایبەتە بە راگرتنی هەمیشەیی ئاگربەست و گەڕانەوەی ئاوارەكان و كشانەوەی هێزەكانی لە كەرتی غەززە و دابینكردنی پێداویستیەكانی هاوڵاتیان.”
لەبەیاننامەکەدا جەختلەوەکراوەتەوە، حەماس لە رێگەی ناوبژیوانەکانەوە درێژە بە دانوستانەكانیان دەدەن، بۆ گەیشتن بەرێككەوتنێك كە داواكارییەكانی گەلی فەلەستین و بەرژەوەندیەكانی بەدیبهێنێت.
