“پۆستی وەزیری شەهیدان لەعەبدوڵڵای حاجی مەحمود وەردەگیرێتەوە”
عەبدوڵای حاجی مەحمود
SNN-عەلی حەمە سەعید
وتەبێژی پارتی سۆسیال دیموكراتی كوردستان رایگەیاند، بەهۆی ئەوەی بەبڕیاری مەكتەبی سیاسی و ئەنجومەنی سەركردایەتی( عەبدوڵڵای حاجی مەحمود) لە حزب دەركراوە و هیچ بەرپرسیارییەتییەكی نییە، بۆیە بە نوسراوی فەرمی داوامان لە ئەنجومەنی وەزیران كردووە كە پۆستی وەزیری لەناو براو وەربگیرێتەوە و ئێمەش سێ كاندیدمان دیاریکردووە بۆ جێگرتنەوەی.
د. فەرهاد تۆفیق، وتەبێژی پارتی سۆسیالیست دیموكراتی كوردستان بە SNNی ڕاگەیاند: لە كۆبوونەوەی پێشووی مەكتەبی سیاسی و ئەنجومەنی سەركردایەتی بڕیاری دوورخستنەوە و دەركردنی (عەبدوڵڵای حاجی مەحمود) لە پارتی سۆسالیست دیموكراتی كوردستان دەركراوە و بە گوێرەی بڕیارەكەش ناوبراو هیچ مافێكی بەسەر حزبەكەوە نەماوە و ئەو موڵك و ماڵەشی كە بۆ پارتی سۆسالیست دەگەڕێتەوە دەبێت بێگیڕێتەوە، هەر لەو چوارچیوەیەشدا ناكرێت كەسێك نوێنەرایەتی پارتەكەمان بكات لە ئەنجومەنی وەزیران كە هیچ بەرپرسیارتییەكی نەبێت و ئەندامی پارتەكەمان نەبێت.
ئاماژەی بەوەشكرد، نوسراویان ئاڕاستەی ئەنجومەنی وەزیران كردوە بۆ ئەوەی پۆستی وەزیری كاروباری شەهیدان بە كەسیك پڕبكرێتەوە كە ئەندامی پارتەكەمان بێت بەرپرسیارێتی هەبێت، بۆ ئەومەبەستەش رێكارە كارگێڕییەكان كە لە دەستی سەرۆكی ئەنجومەنی وەزیراندایە و لە نوسراوەكەشماندا سێ كاندید بە پسپۆڕی جیاواز بۆ ئەو پۆستە دیاریكراون كە بریتین لە هەریەكە لە (فاتیح رەئوف) بەرپرسی دەستەی كارگێری و مەكتەبی سیاسی، (سادق جەباری) كارگێری مەكتەبی سیاسی و (ئامانج جەمال) بەرپرسی نوسینگەی سەرۆكی پارتی سۆسیالیست دیموكراتی كوردستان.
وتەبێژەكەی پارتی سۆسالیست دیموكراتی كوردستان ئەوەشی خستەڕوو، بەگوێرەی دواین بڕیاری ئەنجومەنی سەركردایەتی پارتەكەمان دەبێت بەستنی كۆنگرە لە نزیكترین كاتدا ئەنجام بدرێت، لە روی كارگێڕییەوە چ كاتێك گونجاو بوو، ئەوا ئەو كاتە وەك وادەی دەستپێكی كۆنگرەی پارتی سۆشیالیست دیموكراتی كوردستان دیاری دەكرێت.
