لە سەروبەندی مانگی رەمەزاندا نرخی گۆشتی سوور و مریشك بەبەرزی ماونەتەوە

SNN-عەلی حەمە سەعید
سەرەرای نزیکبوونەوەی مانگی پیرۆزی ڕەمەزان و هاوكات هەوڵی لایەنە پەیوەندیدارەكان بۆ دابەزاندنی نرخی گۆشتی سوور و مریشكی زیندوو، بەڵام هێشتا نرخی ئەو دوو بەرهەمە بەبەرزی ماوەتەوە، بەوتەی لایەنە پەیوەندیدارەكانیش بەرزبوونەوەی ئەو نرخانە پەیوەندی بە چەند بابەتێكی پەیوەست بە ناوخۆ و دەرەوە هەیە.

نازم عەبدوڵا، سەرۆكی كۆمەڵەی كێڵگەپەلەوەرییەكان لە سلیمانی بە SNNی ڕاگەیاند: بەرزبوونەوەی نرخی مریشكی زیندوو پەیوەندی بە بەرز بوونەوەی نرخی جوجك هەیە لە دەرەوە، بەجۆرێك بەراورد بە دوو مانگی ڕابردوو نرخی جوجك بە ڕێژەی لە%50 بەرز بووەتەوە، هاوكات نرخی غاز و پێداویستییەكانی دیكەی كیڵگە پەلەوەرییەكانیش بەهەمان شێوە بەرزبوونەتەوە ئەمە وایكردووە كە تێچووی بەرهەمهێنانی مریشك زیاد بكات لەسەر خاوەن كیڵگە پەلەوەریەكان، بەڵام بەراورد بە نرخی گۆشتی سور نرخی مریشكی زیندوو هەرزانترە.

مستەفا عەبدولرەحمان، سەرۆكی گشتیی یەكێتی هاوردەو ناردنكارانی هەرێمی كوردستان بە SNNی رایگەیاند، داوایان لە وەزارەتە پەیوەندیدارەكانی وەك بازرگانی و پیشەسازی و كشتوكاڵ كردووە، رێكاری پێویست بگیرێتەبەر بۆ ئاسانكاری هاوردەكردنی ئاژەڵ لە دەرەوەی وڵات، هاوكات پێشنیازیشیان كردووە، گومرگ لەسەر ھاوردەكردنی ئاژەڵ هەڵبگیرێت و رێگری بكرێت لە هەناردەكردنی ئاژەڵی خۆماڵی بۆ بازاڕەكانی ناوەڕاست و باشووری عێراق.

وتەكانی ئەو لایەنەنە پەیوەندیدارانە لەكاتێكدایە كە لە ئێستادا نرخی كیلۆیەك مریشكی زیندوو لە بازاڕەكانی هەرێم لەسەروو چوار هەزار دینارەوەیە لە كاتێكدا لە مانگی ڕابردوو نرخی كیلیۆیەك مریشك لە نزیكی دووهەزار و 500 تا سێ‌ هەزار دینار دابوو، هاوكات نرخی كیلیۆیەك گۆشتی سور لە 20 هەزارەوە دەستپێدەكات تا 23 هەزار دینار، ئەمەش لەكاتێكدایە كە لەگەڵ هاتنی مانگی ڕەمەزان هاووڵاتیان زیاتر گۆشتی سور و گۆشتی مریشك بەكار دەهێنن.

ئاماژەی بۆ ئەوەشكردووە، بەرزبوونەوەی نرخی گۆشتی سوور بەشێكی پەیوەستە بە بەرزبونەوەی نرخەكەی لە جیھاندا و بەشێكیشی پەیوەستە بەوەی ئێران ھەناردەكردنی ئاژەڵی لە رێگەی سنورەكانییەوە بۆ دەرەوە قەدەغە كردووە