کەشناسی: ئەمڕۆ و سبەی باران بارین بەردەوام دەبێت

SNN-

بەڕێوەبەرایەتی گشتی کەشناسی و بوومەلەرزەزانی هەرێمی کوردستان بڵاویکردووەتەوە کە ئەمڕۆ و سبەینێ بارانبارین بەردەوام دەبێت و لە ناوچە شاخاوییەکانیش بەفر دەبارێت و پلەکانی گەرماش نزم دەبنەوە.

بەڕێوەبەرایەتییەکە لە راگەیەندراوێکدا بڵاویکردووەتەوە کە ئەمڕۆ دوو شەممە 25- 3- 2024، ئاسمان هەوری تەواو دەبێت لەگەڵ نمە باران لەکاتەکانی بەیانی تاکو و دوایی نیوەڕۆ لەناوچەکانی باکووری رۆژهەڵاتی هەرێم، هەروەها بەفرێکی کەم لەناوچە شاخاوییە سنووریەکاندا، لەکاتەکانی ئێوارە ئاسمان بۆ نیمچە هەور دەگۆڕێت و پلەکانی گەرماش نزم دەبێتەوە (2 – 5 ) پلە لەناوچە جیاجیاکاندا بەراورد بە تۆمارکراوەکانی دوێنێ .

هەروەها سبەی سێشەممە 26ی ئازاری 2024، ئاسمان هەوری تەواو دەبێت , نمە باران سەرەتا لەناوچەکانی بادینان دەست پێدەکات پاشان زۆربەی ناوچەکانی پارێزگاکانی هەولێر و سلێمانی دەگرێتەوە, وە هەروەها بەفرێکی کەمیش لەناوچە شاخاوییە سنووریەکانی باکوور و رۆژهەڵات دەبارێت. پاشان کەش لەکاتەکانی شەودا سەقامگیر دەبێتەوە. وە لەکاتەکانی بەرەبەیانی رۆژ چوارشەممە ئەگەری دروست بوونی تەم هەیە لەناوچەکانی پارێزگای دهۆک و پلەکانی گەرماش نزمبوونەوەیەکی کەم ( 2 – 3 ) پلە بە تایبەت لەناوچەکانی بادینان و ناوچە شاخاوییەکاندا بە بەراوورد بە تۆمارکراوەکانی ئەمڕۆ

بەرزترین پلەکانی گەرمای پێشبینیکراو بە پلەی سیلیزی
هەولێر : 15
سلێمانی :13
دهۆک : 11
زاخۆ : 10
هەڵەبجە : 13
کەرکوک : 18
سۆران : 9
حاجی ئۆمەران : 2
گەرمیان : 17