ئێران: ئەمریکامان لە هێرشەکەی سەر ئیسرائیل ئاگادارکردبووەوە

حسێن ئەمیرعەبدوڵڵاهیان، وەزیرى دەرەوەى ئێران لە کۆبونەوەیەکى لەگەڵ باڵیۆزانى بیانى لە تاران-ى پایتەخت رایگەیاند: ئێران ئەمریکاى لە هێرشەکانى دژى ئیسرائیل ئاگادار کردوەتەوە و پێی راگەیاندون کە هێرشەکان دیاریکراون و بۆ بەرگرییە لە وڵاتەکەیان.

وتیشی: تاران دودڵ نییە لە هەر وەڵامێک دژى هەر دوژمنێک و بەرگرى لە وڵاتەکەى دەکات، دەشڵێت:هێرشەکان بنکەى دەرچونى فڕۆکەى ئێف-16ـى کردوەتە ئامانج.

وەزیرى دەرەوەى ئێران راشیگەیاند: هێرشى ئیسرائیل بۆ سەر کونسوڵخانەى ئێران دژى رێککەوتنە نێودەوڵەتییەکان بووە و ئەوانیش زۆر وردبوون لە وەڵامەکەیان دژى ئەو هێرشە.

حسێن ئەمیرعەبدوڵڵاهیان دەشڵێت، نایانەوێت ئەمریکا و بنکەکانى لە ناوچەکە بکەنە ئامانج، بەڵام ئەگەر لەلایەن بنکەکانى ئەمریکاوە بکرێنە ئامانج ناچار دەبن وەڵامیان هەبێت.