سەرۆکی ئیسرائیل رایدەگەیەنێت مووشەک و درۆنەکانی ئێران بۆ خاکەکەمان راگەیاندنی شەڕە

SNN

سەرۆکی ئیسرائیل رایگەیاند، هێرشە مووشەکی و درۆنییەکانی ئێران بۆ سەر ئیسرائیل راگەیاندنی شەڕە و سەرجەم بژاردەکان لە بەردەمیاندا کراوە دەبن.

ئەمڕۆ دووشەممە 15ی نیسان، ئیسحاق هێرزۆک، سەرۆکی ئیسرائیل سەبارەت بە هێرشەکانی ئێران بۆ سەر خاکەکەیان رایگەیاند، “ئەوەی ئێران کردوویەتی راگەیاندنی شەڕە و هەر بۆیە سەرجەم بژاردەکان کراوەن، پاراستنی خەڵکی خۆمان لەسەرووی هەموو شتێکەوەیە”.

پیتەر لیرنەر،  وتەبێژی سوپای ئیسرائیلی بە ئاژانسی هەواڵی ” ئەی بی سی نیوز”ی ئەمریکی راگەیاند،بە مەبەستی وەڵامدانەوەی هێرشەکەی ئێران  سووپا چەند بژاردەیەکی خستۆتەبەردەم حکومەتی ئیسرائیل.

لیرنەر ئەوەشی ئاشکرا کردووە “رەنگە وەڵامدانەوەکەی ئیسرائیل سەربازی بێت و رەنگیشە بە شێوازێکی دیکە بێت ،ئەمرۆ یان لە رۆژانی داهاتوودا حکومەتی ئیسرائیلی جۆر و کاتی وەڵامدانەوەکە دیاری دەکات”.

هەر ئەمڕۆ ناسر كەنعانی، وتەبێژی وەزارەتی دەرەوەی ئێران لە كۆنگرەیەكی رۆژنامەوانیدا رایگەیاند، نامانەوێت ئاڵۆزییەكانی ناوچەكە فروانترببێت و كاردانەوەی ئێران بە گوێرەی یاسا نێودەوڵەكانیان و كارێكی پێویست بووە و دەبێت رژێمی زایۆنیزم رێز لە هەڵسوكەوتی بەرپرسیارانەی ئێران بگرێت.

روونیکردووەتەوە، ئێران زیاتر لە 300 درۆن و مووشەکی بالیستی و کروزی ئاراستەی ئیسرائیل کرد، بێجگە لە خاکی ئێرانیشەوە، لە سووریا، لوبنان و یەمەنیشەوە هێرش کرایەسەر ئیسرائیل؛ بەڵام بە هاوکاریی فڕۆکە جەنگییەکانی ئەمەریکا و هاوپەیمانانی ئیسرائیل توانی 99 لەسەدی درۆن و مووشەکەکان بخاتەخوارەوە.

لەلایەکی ترەوە، رۆژنامەی “وۆڵ ستریت جۆرنال”ی ئەمریکی لە زاری سێ بەرپرسی حکومی ئەمریکی بڵاویکردەوە رەنگە ئەمرۆ دووشەممە ، ئیسرائیل وەڵامی هێرشەکەی ئێران بداتەوە.

ئەمە لە کاتێکدایە شەوی 13ی نیسان، ئێران لە دژی ئەو هێرشەی ئیسرائیل لە دیمەشق کردیە سەر کونسوڵگەرییەکەیان، لە وەڵامی ئەوەدا ئێران هێرشی مووشەکی و درۆنی کردە سەر ئیسرائیل، ئەمە کاردانەوەی وڵاتانی دەرەوەی لێکەوتەوە و جۆو بایدن، سەرۆکی ئەمریکا پشتگیری خۆی بۆ ئیسرائیل راگەیاند.