لیستی مووچەی مانگی چوار ڕەوانەی بەغدا دەكرێت و مانگی پێنجیش بە پلەبەرزكردنەوە ڕەوانە دەكرێت
SNN-عەلی حەمە سەعید
بەرپرسێکی وەزارەتی دارایی رایدەگەیەنێت، یەكەژمێریارییەكانی سەر بە وەزارەتە جیاوازەكانی حكومەتی هەرێم سەرقاڵی تەواوكاری لیستی مووچەی مانگی چواری ئەمساڵن، وابڕیارە كە هەر لەم هەفتەیەدا و تا پێش 18ی مانگ ڕەوانەی بەغدا بكرێت، هاوكات وەزارەتی دارایی و ئابوریش داوای لە فەرمانگەكان كردووە لیستی مووچەی مانگی پێنج بە پلەبەرزكردنەوە ئامادە بكەن.
بەگوێرەی ئەو زانیارییانەی كە لەبەرپرسێكی وەزارەتی دارایی و ئابوری حكومەتی هەرێم بە SNNدراون ئەوەخراوەتەڕوو، لە دوێنێوە یەكە ژمێریاریەكانی وەزارەت و دەستەجیاوازەكانی حكومەتی هەرێم سەرقاڵی تەواوكاری لیستی مووچەی مانگی نیسانی فەرمانبەرەكانیان و وابڕیارە سبەی یان دووسبەی كۆتایی بە ئامادەكردنی لیستەكان بهێندرێت و پێش 18ی ئەم مانگە ڕەوانەی بەغدا دەكرێت.
ئاماژەی بەوەشكرد، لیستی مووچەی مانگی نیسان هیچ گۆڕانكاریەكی تێدا نەكراوە و بەهەمان شێوەی لیستی مووچەی مانگەكانی شوبات و ئازار ئامادە دەكرێت و ڕەوانەی بەغدا دەكرێت، بەڵام بۆ لیستی مووچەی مانگی ئایار داوا لە یەكە ژمێریارییەكان كراوە كە لیستی مووچەكانیان بە پلە بەرزكردنەوە ئامادە بكەن.
ئەو بەرپرسەی وەزارەتی دارایی و ئابوری حكومەتی هەرێم ئەوەشی خستەڕوو، پلەبەرزكردنەوەكە بەگوێرەی ئەو سیستەمی مووچەیە كە لەهەرێمی كوردستان كاری پێدەكرێت بە گشتی ئەو فەرمانبەر و مامۆستایانەی كە پلەكانیان كەمە بڕی 150 تا 180 هەزار دینار لەمووچەكانیان زیاد دەكات و ئەوانەشی مووچەیان زۆرە و پلەكانیان بەرزە ئەوانیش بەڕێژەیەكی كەمتر مووچەكانیان زیاد دەبێت.
