سەرۆکی ئۆکرانیا داوای هاوکاریی لە ئەمریکا دەکات
SNN
سەرۆکی ئۆکرانیا رایگەیاند، پێویستیان بە هاوکاری ئەمریکایە بۆ ئەوەی ئاسمانی وڵاتەکەی لە هێرشی روسیا بپارێزن، دەڵێت “هەروەک چۆن ئەمریکا هاوکاری ئیسرائیلی کرد لە هێرشەکانی ئێران بەو جۆرەش هاوکاری ئێمە بکات”.
فلادیمێر زلینیسکی لە پێگەی خۆی لە تۆڕی کۆمەڵایەتی ئێکس رایگەیاندووە، کردەوەکانی ئێران هەڕەشە لە هەموو ناوچەکە و جیهان دەکات، هەروەک چۆن کردەوەکانی رووسیا هەڕەشە لە سەرهەڵدانی ململانێیەکی گەورەتر دەکات، هاوکارییەکانی ئەو دوو رژێمەش دەبێتە هۆی بڵاوبوونەوەی تیرۆر، هەر بۆیە پێویستی بە وەڵامێکی تۆکمە و یەکگرتووە کە لە لایەن جیهانەوە بەرەوڕوو ببنەوە.
ئاماژەی بەوەکردووە، هەروەک دەرکەوتووە ئیسرائیل بەتەنها نەبووە لە بەرگریکردنی وڵاتەکەیدا و ئەمریکا ئاسمانی وڵاتی ئیسرائیلی لە هێرشەکانی ئێران پاراستووە، دەڵێت “ئۆکرانیاش ماوەی مانگێک زیاترە چاوەڕێی هاوکاریی وڵاتان دەکات بۆ ئەوەی لە موشەک و درۆنەکانی روسیا پارێزراوبێت”.
