سەفین دزەیی: بایدن ئاگاداریی کێشەی مووچەیی فەرمانبەرانی هەرێمە

SNN

بەرپرسی فەرمانگەی پەیوەندییەکانی دەرەوەی هەرێمی کوردستان ڕایدەگەیەنێت سەرۆکی ئەمریکا ئاگاداری کێشەی مووچەی فەرمانبەرانی هەرێم و دەڵێت “نابێت مووچەی فەرمانبەران تێکەڵ بە ململانێ سیاسییەکان بکرێت”.

ئەمڕۆ سێسەممە، 16ی نیسان، سەفین دزەیی، بەرپرسی فەرمانگەی پەیوەندییەکانی دەرەوەی هەرێمی کوردستان کە یاوەری سەرۆک وەزیرانی عێراق دەکات لە سەردانەکەیدا بۆ ئەمریکا، ڕایگەیاند، جۆو بایدن، سەرۆکی ئەمریکا داوای لە محەمەد شیاع سودانی کردووە کێشەکانی عێراق و هەرێم چارەسەربکرێن، ئەمەش ئاماژەیەكی ڕوونە بۆ ئەوەی سەرۆكی ئەمریکا ئاگاداری كێشەی مووچەی فەرمانبەرانی هەرێمی كوردستانە.

هاوکات، بە پێی ڕاگەیەندراوێکی کۆشکی سپی، جۆ بایدن، سەرۆکی ئەمریکا لە کۆبوونەوەکەدا، دەستخۆشی لە هەوڵەکانی سەرۆک وەزیرانی عێراق و حکومەتی هەرێمی کوردستان کرد بۆ گەیشتن بە ڕێککەوتنێکی درێژخایەن بۆ چارەسەرکردنی ئەو ئاستەنگە درێژخایەنانەی هەن، لەنێویاندا رێککەوتنی ئەو دواییانە بۆ پێدانی دوو مووچەی فەرمانبەرانی هەرێمی کوردستان.

سەبارەت بە هەڵبژاردنەکانی هەرێمی کوردستان، بایدن پشتیوانیی خۆی دووپاتکردەوە بۆ بەهێزکردنی دیموکراسی لە عێراق لەنێویاندا بەڕێوەچوونی هەڵبژاردنێکی ئازاد، دادپەروەر و شەفافانە لە هەرێمی کوردستانی عێراق.

لە كۆبوونەوەی نێوان شاندی حكومەتی عێراق لەگەڵ وەزارەتی دەرەوەی ئەمریکاشدا، ئەنتۆنی بلینکن، وەزیری دەرەوەی ئەمریکا داوای لە حكومەتی عێراق كردووە، دووبارە دەست بكرێتەوە بە هەناردەی نەوتی هەرێمی كوردستان و چارەسەركردنی گشت ئەو کێشانەی كە بەربەستن لەبەردەم پرۆسەكەدا، هاوكات ئەویش دووپاتی لە گرنگی پێوەندییەكانی نێوان هەرێم و بەغدا كردووەتەوە.