وەزارەتی دەرەوەی ئەمریكا: دۆخی ئازادیی و مافی مرۆڤ لە هەرێمی كوردستان خراپتربووە

SNN-

وەزارەتی دەرەوەی ئەمریکا راپۆرتی ساڵانەی خۆی سەبارەت بە مافەکانی مرۆڤ لە هەرێمی کوردستان و عێراق بڵاوکردەوە و رایگەیاند، بەهۆی سنورداركردنی زیاتری ئازادییە بنەڕەتی و مەدەنیەكان لەلایەن هەردوو حكومەتی عێراق و هەرێمی كوردستانەوە، لە ساڵی رابردوودا, دۆخی مافەکانی مرۆڤ خراپتربوون.

وەزارەتی دەرەوەی ئەمریکا, رۆژی دووشەممە راپۆرتەکەی بڵاوکردووەتەوە و دەڵێت:”چەندین پێشێلکاری كراوە, لەوانە، کوشتنی هەڕەمەکی، بێسەروشوێنکردن, ئەشکەنجەدان و مامەڵەکردنی نامرۆڤانە، مامەڵەی توند لەلایەن بەرپرسانی حکومەت و بارودۆخی مەترسیدار و سەختی نێو زیندانەکان, دەستگیرکردن و دەستبەسەرکردنی هەڕەمەکی.

لە راپۆرتەکەی وەزارەتی دەرەوەی ئەمریکا باس لە بەشێکی دیکەی پێشێلکارییەکان کراوە و کە بریتین لە هێرشکردن و زیانگەیاندن بە خەڵکی مەدەنی، تووندوتیژی یان هەڕەشەکردن لەرۆژنامەوانان، دەستگیرکردن و لێپێچینەوەی ناڕەوا دژی رۆژنامەوانان و دەستوەردانی بەرچاو لە ئازادیی گردبوونەوەو گەڕانەوەی زۆرەملێی ئاوارەکانی ناوخۆ بۆ ئەو شوێنانەی کە رووبەڕووی هەڕەشە بوونەتەوە بۆ سەر ژیان و ئازادییان.

“زیندان و ناوەندەکانی چاکسازیی لە دۆخی خراپدان, بەهۆی نەبوونی خۆراکی پێویست، قەرەباڵغی زیندانییەکان، ئەشکەنجەی جەستەیی و پیسی زیندانییەکان و چاودێری تەندروستی و مەترسی گواستنەوەی نەخۆشییەکان، هەروەها لە هەرێمی کوردستان, ژمارەی گیراوان زۆر زیاتربوون لە رووبەری زیندانییەکان و رێژەی قەرەباڵغی نێو زیندانییەکان (157٪)بووە, زیندانیانی نێوجەوانان لەگەڵ گەوران دانراون”. بە گوێرەی راپۆرتەکەی وەزارەتی دەرەوەی ئەمریکا.