هەوڵەکانی هاوتاكردنی مووچەی كەسوكاری شەهیدان و زیندانیانی سیاسیی هەرێم لەگەڵ عێراق بەردەوامە

SNN-عەلی حەمە سەعید

هەوڵەكانی فراكسیۆنی یەكێتی لە پەرلەمانی عێراق بۆ هاوتاكردنی مووچەی کەسوکاری شەهیدان و ئەنفالكراو و كیمیاباران لەهەرێمی كوردستان لەگەڵ مووچەی زیندانیانی سیاسی عێراق بەردەوامی هەیە و ئەندامێكی لیژنەی شەهیدان و قوربانیان و زیندانیانی سیاسی جەخت لەوەدەكاتەوە كە هەوڵەكانیان هەنگاوی باشی بڕیوە، ئەگەر لەمپەری سیاسی بۆ دروستنەكرێت مووچەكانیان هاوتادەكرێن لەگەڵ عێراق.

چرۆحەمە شەریف، ئەندامی لیژنەی شەهیدان و قوربانیان و زیندانیانی سیاسی لە پەرلەمانی عێراق بە SNNی ڕاگەیاند: بەهۆی سیاسەتە شۆڤێنییەكانی حكومەتی پێشووی حكومەتی عیراق، چەندین تاوان و كۆمەڵكوژ و جینۆساید بەرامبەر بە میلەتی كورد كراون كە زۆربەی قوربانییەكان پێشمەرگە و زیندانی سیاسی و هاووڵاتی بێتاوان بوون، بۆیە وەك فراكسیۆنی یەكێتی داوامان لە سەرۆك وەزیرانی عیراق كردووە كە مووچەی وارسی شەهیدان و ئەنفالكراو و كیمیاباران هاوتای عیراق بكرێت.

ئاماژەی بەوەشكرد، وەك ئەندامی لیژنەی شەهیدان و قوربانیان و زیندانیانی سیاسی، دوای هەوڵ و ماندوبوونێكی زۆروچەندینجار كۆكردنەوەی واژۆی ئەندامانی ئەنجومەن لەبارەی هەمواری یاساكەوە، دواجار سەرۆكایەتی ئەنجومەنی نوێنەران بڕ‌یاریدا یاساكە هەموار بكاتەوە و خوێندنەوەی یەكەمیشی بۆكراوە كەپێشتر داوامان كردبوو بەپێی ئەم یاسا نوێیە، زیندانە سیاسییەكانی هەرێمی كوردستانیش سودمەند بن لەو بڕ‌یارانەی لەلایەن حكومەتی عیراقەوە دەردەچن.

ئەو ئەندامەی لیژنەی شەهیدان و قوربانیان و زیندانیانی سیاسی ئەوەشی خستەڕوو، وەك فراكسیۆنی یەكێتی لە ئەنجومەنی نوێنەرانی عیراق لە كۆبوونەوەمان لەگەڵ سەرۆك وەزیرانی عیراق بە نووسراوی فەرمی داوامان لێكردووە كە هەوڵی هەمواری یاسای زیندانیانی سیاسی و هاوتاكردنی مووچەی وارسی شەهیدان و ئەنفالكراو و كیمیاباران و بدات، چونكە لەهەرێمی كوردستان نزیكەی 200 هەزار شەهید‌ و 25 هەزار زیندانی سیاسی تۆماركرون ئەگەر مووچەی ئەو توێژانە لەگەڵ عیراق هاوتا بكرێت، ئەوا زیاتر لە 100 هەزار كەس كە وارسی شەهیدانن یان زیندانیانی سیاسین سوودمەند دەبن.