بەڕێوەبەری ئۆفیسی کۆمیسیۆنی هەڵبژاردنەکان لە هەولێر گۆڕدرا

SNN

کۆمیسیۆنی باڵای سەربەخۆی هەڵبژاردنەکانی عێراق رایگەیاند، لەبەر پێویستی و بەرژەوەندی گشتی بەڕێوەبەری کۆمیسیۆنی هەڵبژاردنەکان لە هەولێر گۆڕدراوە.

ئەمڕۆ چوارشەممە 24ی نیسان، کۆمیسیۆنی باڵای سەربەخۆی هەڵبژاردنەکانی عێراق رایگەیاند، ئەنجومەنی کۆمسیارانی کۆمسیۆنی باڵای سەربەخۆی هەڵبژاردنەکان، مەڕوان محەمەد ساڵحی ڕاسپارد بۆ بەڕێوەبردنی ئۆفيسى هەڵبژاردنەكانی پارێزگای هەولێر.

ئاماژەی بەوەکردووە، مەڕوان محەمەد ساڵح لە شوێنی حەیدەر محەمەد دەستبەکاربووە، کە بەڕێوەبەری پێشووی ئۆفیسی کۆمیسیۆنی هەڵبژاردنەکان لە هەولێر بووە.

سەبارەت بەو گۆڕانکارییە، کۆمیسیۆنی عێراق روونیکردەوە، ئەم ڕاسپاردانە لەبەر پێویستی و بەرژەوەندی گشتیی و گرەنتیدان  و دەستەبەرکردنی هاوسەنگی کارەکان لە نێوان کارگێڕی و بەرپرسانی هۆبەکان و سەرجەم فەرمانبەرانی فەرمانگەکە ئەنجام درا.

جەختی لەوەکردەوە، بڕیارەکە وەک ئامادەکارییەک بۆ ئەنجامدانی هەڵبژاردنی پەرلەمانی کوردستان دراوە کە بڕیارە 10ی حوزەیرانی داهاتوو بەڕێوەبچێت.