“واژۆی 85 پەرلەمانتارمان بۆ قەرەبووكردنەوەی قوربانیانی كیمبارانی هەڵەبجە کۆکردووەتەوە”

SNN-عەلی حەمە سەعید

ئەندامێكی ئەنجومەنی نوێنەرانی عێراق فراكسیۆنی یەكێتی ئاماژە بەوەدەكات بەمەبەستی قەرەبووكردنەوەی كەسوكاری شەهیدان و قوربانیانی كیمبارانی هەڵەبجە، لەناو پەرلەمانی عێراق واژۆی 85 پەرلەمانتار لە فراكسیۆنە جیاوازەكان كۆكراوەتەوە بۆ ئەوەی ئاراستەی دەستەی سەرۆكایەتی پەرلەمان و لایەنی پەیوەندیداری بكرێت بۆ پابەندكردنی حكومەتی عێراق بە قەرەبووكردنەوەی كەسوكاری شەهیدانی هەڵەبجە.

چرۆ حەمە شەریف، ئەندامی ئەنجومەنی نوێنەران لە فراكسیۆنی یەكێتی و نوێنەری هەڵەبجە لە پەرلەمانی عێراق بە SNNی ڕاگەیاند: بەمەبەستی دروستكردنی فشار بۆ ئەوەی حكومەتی عێراق و لایەنە پەیوەندیدارەكان پابەندبكرێن بە قەرەبووكردنەوەی كەسوكاری شەهیدانی هەڵەبجە واژۆی 85 پەرلەمانتارمان لە فراكسیۆنە جیاوازەكان كۆكردوەتەوە و داوای قەرەبوكرنەوەی مادی و مەعنەویمان كردووە بۆكەسوكاری قوربانیانی كیمیابارانی هەڵەبجە و هاوڵاتیانی شارەكە.

ئاماژەی بەوەشكرد، دەبوو لەدوای ڕووخانی ڕژێمی بەعس حكومەتی عێراق بە ئەركی ئەخلاقی خۆی هەستایە و قەرەبووی كەسوكاری شەهیدانی هەڵەبجە و شەهیدانی دیكەی دەستی ڕژێمی بەعسی بكردایەتەوە، لەكاتێكدا كەسوكاری شەهیدان و قوربانیانی دیكەی دەستی ڕژێمی بەعس لە پارێزگاكانی دیكەی عێراق قەرەبووكراونەتەوە و مووچەشیان بۆ بڕاوەتەوە بۆیە ناكرێت جیاوازی لەنێوان هاووڵاتیانی هەرێم و پارێزگاكانی دیكەی عێراق بكرێت.

ئەو ئەندامەی ئەنجومەنی نوێنەرانی عێراق لە فراكسیۆنی یەكێتی ئەوەشی خستەڕوو،  ئەو 85 پەرلەمانتارە پەرلەمانتاری فراكسیۆنە جیاوازەكانن و لە كوتلە كوردی و عەرەبییەكان هاوكات سەرۆكی پەرلەمانیش بەوەكالەت داواكەی ئاڕاستەی لایەنە پەیوەندیدارەكان كردووە بۆ قەرەبووكردنەوە و لە داهاتوویەكی نزیكیشدا ئەم داوایە دەكرێتە پرۆژە یاسا و حكومەتی عێراق ناچار دەكرێت بە قەربووكردنەوەی قوربانیانی دەستی ڕژێمی بەعس لە هەڵەبجە و هەرێمی كوردستان.