وادەی ناردنی یەكەم كاروانی حاجیانی هەرێم بۆ سعودییە
حاجیه‌ك له وه‌رزى حه‌جدا | فۆتۆ: BBC
SNN-عەلی حەمە سەعید
رۆژى 28ى ئایار، یه‌كه‌مین كاروانى حاجیانى هه‌رێم به‌ره‌و سعودیه به‌ڕێده‌كه‌ون و رۆژى 5ى حوزه‌یرانیش كۆتا گروپى حاجیان ده‌گه‌نه سعودیه.
ئه‌مڕۆ شه‌ممه 4ى ئایار، كاروان ستونى، وتەبێژی بەڕێوەبەرایەتی گشتی حەج و عومرە‌ی هەرێم بە وه‌كاله‌ت به SNNی راگەیاند، “ئامادەكارییەكانی بەڕێوەبەرایەتی گشتی حەج و عومرە لە پارێزگا و ئیدارە سەربەخۆكان بەردەوامی هەیە بۆ ئەوەی ئەمساڵیش هاوشێوەی ساڵانی رابردوو ئەو كەسانەی كە ناوییان دەرچووە بۆ ئەنجامدانی فەریزەی حەج رەوانەی سعودییە بكرێن، لەو چوارچێوەیەشدا رۆژی 28ی ئە‌م مانگە یەكەم كاروانی حاجیانی هەرێم ده‌گه‌نه سعودیه”.
له وه‌ڵامى ئه‌و پرسیاره‌ى، ژماره‌ى یه‌كه‌مین كاروانى حاجیان كه به‌ره‌و سعودیه به‌ڕێده‌كه‌ون چه‌نده؟ كاروان ستونى وتى: “ژمارەیان هەزار و 500 كەسە، لەڕێگەی وشكانییەوە بەرەو سعودییە بەڕێدەكەون”.
به وته‌ى وتەبێژی بەڕێوەبەرایەتی گشتی حەج و عومرە‌ی هەرێم، “لەدوای ناردنی یەكەم كاروانی حاجییان بە رێگای وشكانى، لە رۆژی 29ی ئە‌م مانگە‌ش یەكەم كاروانی حاجییان، كە ژمارەیان سێ هەزار و 185 كەسە لەڕێگەی ئاسمانییەوە دەچنە سعودیە، تاوه‌كو رۆژی 5ى حوزه‌یران سەرجەم حاجییانی هەرێم دەگەنە سعودییە به‌مه‌به‌ستى به‌جێهێنانى فه‌ریزه‌ى حه‌ج”.
به‌پێى زانیارییه‌كانى بەڕێوەبەرایەتی حەج و عومرە‌ی هەرێم تێچوی حەجی ئەمساڵ لەڕێگەی هێڵی ئاسمانیه‌وه شەش ملیۆن و 650 هەزار دینارە، لەڕێگەی وشكانیشەوە بڕی پێنج ملیۆن و 300 هەزار دینارە تێچووه‌كه‌ى. هاوكات ژماره‌ى ئه‌و كه‌سانه‌ى كه به‌مه‌به‌ستى به‌جێهێنانى فه‌ریزه‌ى حه‌ج روو له سعودیه ده‌كه‌ن له هه‌رێمى كوردستانه‌وه، بریتییە لە چوار هەزار و 685 كه‌س.
