بانکی TBI بەشداری لە پرۆسەی بە بانکیکردنی مووچەی مووچەخۆرانی هەرێم دەکات

SNN-

بانکی بازرگانیی عێراق (TBI) راگەیاند، لەسەر بڕیاری دادگای فیدراڵی، بەشداری لە بەبانکیکردنی مووچەی مووچەخۆرانی هەرێم دەکەین.

لە راگەیەندراوێکدا بانکەکە بڵاویکردەوە، بە پابەندبوون بە بڕیارەکانی دادگای باڵای فیدراڵی و بە پشتبەستن بە رێنماییەکانی سەرۆکوەزیرانی عێراق، بەشداری لە پرۆسەی بەبانکیکردنی مووچەی مووچەخۆرانی هەرێم دەکەین.

بەگوێرەی راگەیەندراوەکە، وەفدێکی بانکی بازرگانیی عێراق بە سەرۆکایەتیی بەڕێوەبەری لقی هەولێری بانکەکە لەگەڵ وەفدی حکومەتی هەرێم لە پارێزگای هەولێر سەبارەت بە میکانیزمی بەبانکیکردنی مووچەی فەرمانبەرانی هەرێم کۆبوونەوە.

لە راگەیەندراوەکەدا هاتووە، لە کۆبوونەوەکەدا باس لە پێداویستییەکانی پرۆسەی کردنەوەی ئەکاونت، دەرکردنی کارت، و بڵاوکردنەوەی ئامێری وەرگرتنی پارەی ئۆتۆماتیکی (ATM) لە سەرتاسەری هەرێم کرا.

راشیگەیاندووە، بانکی بازرگانیی عێراق ئامادەیی تەواوی خۆی دەربڕی بۆ پێشکەشکردنی خزمەتگوزاریی بەبانکیکردنی مووچە و پێدانی کارتی ئەلیکترۆنی بە فەرمانبەرانی کەرتی حکومی لە هەرێمی کوردستان، هەروەها بانکەکە چاوەڕێی حکومەتی هەرێم دەکات بۆ ناردنی لیستی ناوەکان بۆ ئەوەی دەست بە پرۆسەی بەبانکیکردن بکرێت.