“مووچەی خانەنشینانی هەرێمی کوردستان هاوتای عێراق دەکرێت”

جێگری پێشوى سەرۆکى ئەنجومەنى نوێنەرانى عێراق زانیاری نوێ لەسەر پلەبەرزکردنەوە و تەوتینی مووچەی فەرمانبەران ئاشکرا دەکات و دەڵێت:” ئەو فەرمانبەرانەى چەند ساڵە پلەبەرزکردنەوەیان راگیراوە قەرەبوودەکرێنەوە و پرۆسەى تەوطینى مووچەى فەرمانبەرانیش بەردەوامە و پێویستە هەرێمى کوردستان بەردەوام لیستى ناوەکان بنێرێت بۆ بەغداد”.

د. بەشیر حەداد، جێگری پێشوى ئەنجومەنى نوێنەرانى عێراق رایگەیاند، لە چەند مانگى داهاتودا پلەبەرزکردنەوەى مووچەى فەرمانبەرانى هەرێم و هاوتاکردنى مووچەى خانەنشینان دەچێتە بوارى جێبەجێکردنەوە.

دەشڵێت:”ئەو فەرمانبەرانەى چەند ساڵێکە پلەبەرزکردنەوەیان وەستاوە قەرەبوودەکرێنەوە، چونکە ئەوە مافێکى دەستوریی خۆیانە و دەستور بەرگرى لەو مافەیان کردوە، هەروەها مووچەى خانەنشینانیش هاوتاى عێراق دەکرێت.

سەبارەت بە شێوازى دانەوەى قەرەبووى پلەبەرزکردنەوەى فەرمانبەران راشیگەیاند، شێوازى دانەوەکەى بەسەر یەکەوە نابێت و ئەگەرێکى زۆر هەیە مانگانە لەگەڵ مووچەکەیان بڕێک لە قەرەبوەکەش وەربگرنەوە.

پرۆسەی تەوتین دەستىپێکردوە و بەردەوام دەبێت، ئەوەى گرنگە ئەوەیە پرۆسەکە چۆن دەستى پێکردوە بەوجۆرە بەردەوام بێت و ئەو مووچەخۆرانەى بەشدارى پرۆژەى هەژمارى من نەبوون ناویان بنێردرێتە بەغداد تا پرۆسەى بەبانکیکردنى مووچەکانیان تەواو بکرێت.

“مووچەی خانەنشینان هاوتای عێراق دەکرێت”