“وردبینی لە لیستی مووچە دەستیپێکردووە و پێش جەژن پارە دەنێردرێت”

SNN- عەلی حەمەسەعید

دوای ئەوەی وەزارەتی دارایی حکومەتی هەرێم لیستی مووچەی مانگی ئایاری رەوانەی بەغدا کرد، پەرلەمانتارێک رایگەیاند، وەزارەتی دارایی حکومەتی فیدڕاڵ دەستی بە وردبینی کردووە و گەشبینە بەوەی پێش جەژن مووچە رەوانە بکرێت.

شێروان دوبەردانی ئەندامی پەرلەمانی عێراق بە SNN ی راگەیاند: بەگوێرەی بەدواداچوونەکان، وەزارەتی دارایی فیدڕاڵ دەستی بە وردبینی لە لیستی مووچەی فەرمانبەران و مووچەخۆرانی هەرێمی کوردستان کردووە.

باسی لەوەشکرد، “بەهۆی نزیکبوونەوەی جەژنی قوربانەوە چاوەڕێ دەکەین پرۆسەی وردبینیەکە خێراتر بکرێت و پێش جەژن پارەی مووچە رەوانەی هەرێم بکرێت”.

رۆژی سێ شەممە 4ی حوزەیران وەزارەتی دارایی و ئابووریی حكومەتی هەرێمی كوردستان، رایگەیاند: “لیستی مووچەی مانگی ئایاری فەرمانبەران و مووچەخۆرانی هەرێمی کوردستان، ڕادەستی وەزارەتی دارایی حکوومەتی فیدراڵ کرا.”