بەڵگەنامە نهێنییەکان ئاشکرا دەکرێن “ئیسڕائیل لە جەنگی ئێران عێراق، هاوکاری ئێرانی کردووە”

SNN

رۆژنامەی “ئۆرشەلیم پۆستی”ی نیمچە فەرمی ئیسڕائیل لە راپۆرتێکی خۆیدا، بە چەندین بەڵگە، زانیاری لەسەر ئەو هاوکارییە سەربازیانە بڵاودەکاتەوە کە ئیسڕائیل لە جەنگی 8 ساڵەی ئێران عێراقدا، هاوکاریی وڵاتی ئێرانی کردووە.

رۆژنامەکە لە راپۆرتەکەیدا ئاماژە بەوەدەکات، هاوکارییەکانی ئیسڕائیل بۆ ئێران بریتیبوون لە هاوکاری لە پێدانی زانیاری هەواڵگری و جوڵەی هێزەکانی عێراق لە هێڵەکانی پێشەوە، لەگەڵ پێدانی فرۆکەی جەنگی و تانک و چەکی دژە تانک و تفەنگ و زانیاری و راهێنانی سوپای پاسداران لەو کاتەدا.

رۆژنامەکە ئەوەش رووندەکاتەوە، لەبەر ئەوەی وڵاتی ئیسڕائیل لەو کاتەدا لەلایەن سەرجەم وڵاتانی عەرەبییەوە ئابڵۆقەی توندی خرابوویەسەر و بەتایبەتی کە هیچ وڵاتێکیان ئامادە نەبوون نەوتی پێبفرۆشێت، بۆیە باشترین وڵات لەو کاتەدا کە دژە عەرەب و بەتایبەت عێراق بوون وڵاتی ئێران بوون کە نەوتیان لێ بکرێت، هەر بۆیە ئەویش بە چەکی نوێ و زانیاری سەربازی هاوکاری ئێرانی دەکرد.

هەر لە راپۆرتەکەیدا رۆژنامەکە ئەوە رووندەکاتەوە، تەنانەت لە ساڵی 1981دا و لەکاتی تەقاندنەوەی وێستگەی ئەتۆمی “تەمووز”، لە عێراق دەزگای ئیتڵاعاتی ئێرانی، دێنە نێو عێراق و راپۆرتی ورد لەسەر وێستگەکە کۆدەکەنەوە و دەیدەنە وڵاتی ئیسڕائیل و وڵاتی ئیسڕائیلیش لە ئۆپراسیۆنی “ئۆپێرادا” لە ساڵی 1981 وێستگە ئەتۆمییەکەی عێراق بۆردومان دەکەن و تەختی زەوی دەکەن.

دەشڵێت: لەو کاتەدا سوپای پاسدارانی ئێران، بەشێکی زۆری چەکەکانیان ئەمریکی بوون و کە لە دوای رووخانی رژێمی شای ئێران دەستیانکەوتبوو، ئەم چەکانە پێویستیان بە پارچەی یەدەگ و چاکردنەوەی ئەمریکی بوو، لەوکاتانەشدا ئەمریکا پەیوەندی لەگەڵ ئێراندا نەبوو، ئامادەش نەبوو هیچ هاوکارییەکیان بکات، بۆیە وڵاتی ئیسڕائیل دووبارە هەستا بە پەیدا کردنی تەواوی پارچەی یەدەگی چەک و تانک و فرۆکە ئەمریکییەکان بۆ وڵاتی ئێران.

رۆژنامەکە لە راپۆرتەکەیدا بە راشکاوانە دەڵێت، کە وڵاتی ئیسڕائیل حەزی بەوە دەکرد کە ئێران بەهێزبێت و بە بەهێزی بمێنێتەوە، بۆ راگرتنی باڵانسێک لە رۆژهەڵاتی ناوەڕاست و بوونی بەربەستێک لە بەرامبەر هێز و دەسەڵاتی سەدام حسێن، کە ئیسڕائیل لەو کاتەدا بە گەورەترین و مەترسیدارتین دوژمی خۆی دەزانی.

رۆژنامەکە دەشڵێت، ئیسڕائیل لە ساڵی 1980وە وەک یەکەم وڵات دەستی هاوکاری بۆ ئێران راکێشا لە جەنگەکەی دژی عێراق و هەر لەو ساڵەشدا 16 فرۆکەی جەنگی “فانتۆم ئێف 4″ی ئەمریکیان پێدەدەن، ئەمەش وا دەکات لە ساڵی 1983دا پەیوەندییەکانی نێوان ئەمریکا و ئیسڕائیل بە تەواوەتی گرژی تێبکەوێت و ئەمریکا بە هەموو جۆرێک رەتی دەکاتەوە کە چەکی ئەمریکی بدرێتە وڵاتی ئێران لە رێگەی ئیسڕائیلەوە، بۆیە هەر لەو ساڵەدا نوسینگەی پەیوەندییەکانی ئیسڕائیل لە واشنتنەوە دەگوازرێتەوە بۆ لەندەنی پایتەختی بەریتانیا و لە وڵاتەوە چەک دەنێرێت بۆ ئێران تا لە جەنگەکەی بەرامبەر عێراق بەردەوامی هەبێت.

رۆژنامەکە لە کۆتایی راپۆرتەکەیدا، ئەوەش رووندەکاتەوە، هاوکارییەکانی ئیسڕائیل بۆ ئێران لە جەنگی 8 ساڵەی ئێران عێراق ساڵی بە 600 ملیۆن دۆلار مەزەندە دەکرێت، دواتریش کە جەنگی ئێران عێراق کۆتایی هات، ئێران دەیویست ئیسڕائیل لە هاوکارییە سەربازی و هەواڵگرییەکانی بۆ ئێران بەردەوامبێت، بەڵام ئیسڕائیل کۆتایی بە هاوکارییەکانی هێنا، ئەمەش وای کرد ئێران راستەوخۆو لە ساڵی 1989وە ئێران وەک دوژمنی خۆی و فەڵەستین بناسێنێت.