“تا کۆتایی ئەم مانگە دواین کەمپی ئاوارەکان لە سلێمانی دادەخرێت”
SNN
عەلی جەهانگیر، وتەبێژەی وەزارەتی كۆچ و كۆچبەران لە لێدوانێكی رۆژنامەوانیدا رایگەیاند:وەزارەتەكەیان كۆتایی مانگی حوزەیرانی دیاریكردووە بۆ داخستنی كەمپی”ئاشتی”، دواین كەمپی ئاوارەكان لە پارێزگای سلێمانی، كە (250) خێزان لەخۆدەگرێت.
ئەمە لەکاتێکدایە، وەزارەتی كۆچ و كۆچبەرانی عێراق جەختدەكات لەسەر بەردەوامی هەنگاوەكانی بۆ جێبەجێكردنی بڕیارەكەی حكومەت بە داخستنی كەمپەكان لە هەرێمی كوردستان، هەر ئاوارەیەكیش نەگەڕێتەوە لەو وادەیەی دیاریكراوە، وەك نیشتەجێی كوردستان مامەڵەی لەگەڵ دەكرێت و سیفەتی ئاوارەیی نامێنێت.
هاوکات، وەزارەتی كۆچ هاوكاری (4)ملیۆن دیناری عێراقی و كۆمەڵێك كەلوپەلی ناوماڵ پێشكەش بە هەر خێزانێك دەكات، ئەو هاوكاریە ئەو خێزانانە ناگرێتەوە كە لەدوای (30) تەمموزی داهاتوەوە دەگەڕێنەوە بۆ ناوچەكانیان.
