هۆکاری نەناردنی مووچەی فەرمانبەران لە لایەن بەغداوە ئاشکرابوو

SNN-عەلی حەمە سەعید
بریكاری پێشووی وەزیری دارایی عێراق ئاماژە بەوەدەكات ماوەی سێ‌ ڕۆژە لەلایەن وەزارەتی دارایی عێراق بڕیاری خەرجكردنی پارەی مووچەی مانگی شەشی فەرمانبەرانی شارستانی هەرێم دەرچووە، بەڵام بۆ وەزارەتی دارایی هەرێم لیستی مووچە ڕاناگەیەنێت ئەوە پەیوەندی بەخۆیانەوە هەیە و گرنگ ئەوەیە بڕیارەكە دەرچووە.

فازل نەبی، بریكاری پێشووی وەزیری دارایی عێراق بە SNNی ڕاگەیاند: پێش سێ‌ ڕۆژ لەلایەن وەزارەتی دارایی عێراقەوە بڕیاری خەرجكردنی پارەی مووچەی فەرمانبەرانی شارستانی بۆ مانگی شەش دەرچووە، هاوكات ناردنی پارەكەش یەك بۆ دوو ڕۆژێكی پێویستە تا ڕێوشوێنە ئیدارییەكان تەواو دەبن.

ئاماژەی بەوەشكرد، دەبێت ئێستا پارەی مووچەی مانگی شەشی فەرمانبەرانی شارستانی هەرێم لەبەردەستی وەزارەتی دارایی هەرێم بێت، هاوكات ڕانەگەیاندنی لیستی مووچەی فەرمانبەران پەیوەندی بە خودی وەزارەتی دارایی هەرێم هەیە ئاخۆ بۆچی لیستی مووچە ڕاناگەیەنن چونگە بڕیاری خەرجكردنی پارەكە دەرچووە ئەوەش لە هەموو شت گرنگترە.

بەرپرسێكی وەزارەتی دارایی و ئابوری حكومەتی هەرێمیش ئەوەی بە SNNڕاگەیاندن كە تائێستا هیچ بڕە پارەیەك لەلایەن وەزارەتی دارایی عێراقەوە نەخراوەتە سەر هەژماری وەزارەتی دارایی هەرێم، هەركات پارە گەیشت لیستی مووچە بڵاودەكرێتەوە ئەوەش بە گوێرەی پارەی ئەو وەزارەت و فەرمانگانەی كە بەدەستمان دەگات.