ئەمڕۆ ئەم شوێنانە مووچەی مانگی شەش وەردەگرن

SNN

لەدوای ئەوەی وەزارەتی دارایی بەغدا دوێنێ سێشەممە تەمویلی چەند وەزارەتێکی هەرێمی رەوانەی هەژماری بانکی وەزارەتی دارایی کرد، ئەمڕۆ چەند وەزارەتێک مووچەی مانگی شەش وەردەگرن.

بەگوێرەی ئەو خشتەیەی وەزارەتی دارایی و ئابوری هەرێم بڵاویکردووەتەوە، ئەمڕۆ چوارشەممە 10ی تەمموز، هەریەکە لە وەزارەتەکانی تەندروستیی و کارو کاروباری کۆمەڵایەتی و وەزارەتی ناوخۆ و رەگەزنامە و دەستەی دەستپاکی و دەستەی وەبەرهێنان و دەستەی ژینگە و دەزگای مین و ناوچەکانی دەرەوەی هەرێم و دیوانی چاودێری دارایی لەگەڵ مافی مرۆڤ، مووچەی مانگی شەش وەردەگرن.

دابەشکردنی مووچەش دوای ئەوە دێت، دوێنێ وەزارەتی دارایی و ئابوری عێراق بڕی 421 ملیار و 760 ملیۆن دیناری خستە سەر هەژماری وەزارەتیی دارایی هەرێم و لیستی مووچە راگەیەنرا.

هاوکات، لە لیستی مووچەدا چەند وەزارەتێکی تێدا نەبووە ئەوانیش وەزارەتی کارەبا و سەرۆکایەتی پەرلەمانی هەرێم، هۆکارەکەشی بۆ نەهاتنی پارەکانیان لەلایەن بەغداوە گەڕاندووەتەوە، لەوبارەیەوە وەزارەتی کارەبا روونکردنەوەی بڵاوکردەوە و ئاشکرایکرد، ئەو تێبینیانەی دیوانی چاودێریی دارایی عێراق لەسەر لیستەکەیانی هەبووە چارەسەر بووە.

ئەمە لە کاتێکدایە، سێ مانگە هێزە ئەمنییەکانی هەرێم تەنها یەک مووچەیان وەرگرتووە و هاوشێوەی مانگی پێنج بۆ مانگی تەمموزیش مووچە وەرناگرن و پارەکەیان لەلایەن بەغداوە بۆ تەمویل نەکراوە.

سەبارەت بە هۆکاری دابەشنەکردنی مووچەی هێزەئەمنییەکان، هەریەکە لە دارا سێکانیان و سۆران عومەر ئەندامی ئەنجوومەنی نوێنەرانی عێراق لە چاوپێکەوتنێکدا بە SNNیان راگەیاند، کێشە لە لیستی مووچەی هێزە ئەمنییەکاندا هەیە و دارایی عێراق تێبینی لەسەر هەیە.