SNNسیناریۆیەكی پێدانی پارە بە هێزە ئەمنییەكان ئاشكرا دەكات

SNN-عەلی حەمە سەعید

بەمەبەستی وردبینیكردن لە لیستی مووچەی هیزە ئەمنییەكان شاندێكی دیوانی چاودێری دارایی عێراق گەیشتوونەتە هەولێر و لە ئەمڕۆوە بەهەماهەنگی لەگەڵ دیوانی چاودێری دارایی هەرێم دەستیان كردووە بە پێداچوونەوە و وردبینركدن لە لیستی مووچەی هێزە ئەمنییەكان، هاوكات یەكێك لە سیناریۆكان پێدانی سولفەیەكە بە وەزارەتی دارایی هەرێم تاكاتی تەواو بوونی وردبینییەكە.

بەگوێرەی ئەو زانیارییانەی كە لەبەرپرسێكی وەزارەتی دارایی و ئابوری حكومەتی هەرێم وەریگرتووە ئەوە خراوەتەڕوو، لەشەوی ڕابردووەوە شاندێكی 15 كەسی لە دیوانی چاودێری دارایی عێراق گەیشتوونەتە شاری هەولێر و لەئەمڕۆوە بەهەماهەنگی لەگەڵ دیوانی چاودێری دارایی هەرێم دەستیان كردووە بە پێداچوونەوە بە لیستی مووچەی هێزە ئەمنییەكان.

ئاماژەی بەوەشكرد، كاری ئەو لیژنەیە تەنها وردبینیكردنی ناوی هێزە ئەمنییەكان نییە، بەڵكوو پێداچوونەوەش دەكەن بەو پلە و پۆستانەی كە بەشێوەیەكی نایاسایی و بەدەر لە ڕێنماییەكان دراوە بە ئەفسەران و پلەدارانی هێزە ئەمنییەكان، هەر ئەفەسەرێك بە دەر لە ڕێنماییەكان پلەی پێدرابێت لێی وەردەگیرێتەوە.

ئەو بەرپرسەی وەزارەتی دارایی و ئابوری حكومەتی هەرێم ئەوەشی خستەڕوو، كاری ئەو لیژنەیە ئاسان نابێت و بەزوویش كارەكانیان بەكۆتا ناگات، بەڵكوو دوو ئەرکی سەرەكییان دەبێت یەكەم وردبینیكردنی لیستی مووچەیە و پاككردنەوەیەتی لە ناوی بیانی، دووەمیش پێداچوونەوەیە بەو پلە سەربازیانەی دراون بە ئەفسەرانی هێزە ئەمنییەكان، بۆیە سیناریۆیەك هەیە، بۆئەوەی تا ئەوكاتەی كاری ئەم لیژنەیە تەواو دەبێت بەشێوەی سولفە بڕی 300 ملیار دینارێك بخرێتە سەرهەژماری وەزارەتی دارایی هەرێم بۆ دابەشكردنی مووچەی هێزە ئەمنییەكان دوای تەواوبوونی وردبینی لەمانگەكانی داهاتوو لە پشكی هەرێم ببڕێت یان بۆی زیاد بكرێت.