“پێویستە فراکسیۆنی پارتی لە کەرکوک بەرپرسیارانە مامەڵە بکەن و پشتگیری یەکێتی بکەن”
SNN-عەلی حەمەسەعید
لێپرسراوی بۆردی راگەیاندنی یەكێتیی نیشتمانیی كوردستان ئاماژە بەوەدەكات لە كاتی هەڵبژاردنی جێگری یەكەمی پارێزگاری نەینەوا، فراكسیۆنی یەكێتی دەنگیان بە كاندیدی پارتی داوە و دەستپێشخەریمان كردووە و دەمانەوێت لێكتێگەیشتن هەبێت بۆیە هەردوو ئیدارەی كەركوك و نەینەوا بۆ كورد زۆرگرنگە، پارێزگاری كەركوك مافی یەكێتییە.
لەتیف نێروەیی، لێپرسراوی بۆردی راگەیاندنی یەكێتی نیشتمانی كوردستان بە SNNی ڕاگەیاند: ئێمە لە یەكێتیی نشتیمانی كوردستان هەمیشە بە گیانی بەرپرسیارێتی مامەڵەمان كردووە، بەرژەوەندی تایبەتی خۆمانمان نەخستووەتە پێش بەرژەوەندی گەلەكەمان، بەنمونمە ئێمە دەستپێشخەربووین لە نەینەوا وەك فراكسیۆنی یەكێتی دەنگمان بە كاندیدەكەی پارتی دا بۆ جێگری پارێزگار.
ئاماژەی بەوەشكرد، ئێستا كە كمتر لە مانگێك دیاریكراوە بۆ پێكهێنانی ئیدارەی نوێی كەركوك، یەكێتیش بەمافی خۆی دەزانێت بەگوێرەی ئیستحقاقی خۆی ستەم لە هیچ لایەنێك نەكرێت و پۆستی پارێزگاری كەركوكی پێبدرێت، بۆ ئەوەش دەبێت فراكسیۆنی پارتی بە بەرپرسیارانە مامەڵە بكەن و پشتگیری یەكێتی بكەن لەو بابەتەدا، چونكە بابەتی هەردوو ئیدارەی كەركوك و نەینەوا بۆ هەرێمی كوردستان زۆرگرنگە.
لێپرسراوی بۆردی راگەیاندنی یەكێتیی نیشتمانیی كوردستان ئەوەشی خستەڕوو، ئێمە لە كەركوك گرفتی ئەوەمان نییە كێ بكەینە پارێزگار، چونكە یەكێتی زۆر كەسی بەتوانا و لێهاتووی هەیە كە ببێتە جێ”ەی ڕازامەندی هەموو پێكهاتەكانی كەركوك و بەبێ جیاوازی خزمەت بكات، بۆیە ئەوەی ئێستە بۆ یەكێتی و گەلی كوردیش گرنگە ئەوەیە پۆستی پارێزگار بۆ كورد بێت و لەناو كوردیش بۆ یەكێتی بێت.
