” لەپێناو یەكڕیزی ماڵی كورد یەكێتی زۆر سازشی لەمافی خۆی كردووە”
SNN-عەلی حەمە سەعید
نوێنەرێكی كەركوك لە پەرلەمانی عێراق ئاماژە بەوەدەكات هەموو هەوڵێكی یەكێتی و پەرلەمانتارانی فراكسیۆنەكەمان ئەوەبووە كە ڕێگە بگرین لەو كارە نایاساییانەی كە لەماوەكانی ڕابردوودا لە كەركوك لەلایەن پارێزگاری سەپێندراوی كەركوكەوە ئەنجام دراون، بەڵام پارتی بەهەمووشێوەیەك هەوڵی ڕێككەوتنی ژیربەژیری داوە لەدژی یەكێتی.
سەباح حەبیب، ئەندامی ئەنجومەنمی نوێنەرانی عێراق و نوێنەری كەركوک لە پەرلەمانی عێراق بە SNNی ڕاگەیاند: تۆمەباركردنی یەكێتی لەلایەن پارتییەوە بەوەی كە گوایە ڕێككەوتنی ژێربەژێری كردووە و یەكێتی هۆكاری مانەوەی (ڕاكان جبوری) بووە لە پۆستەكەی تۆمەتی زۆر بێبەنمان، چونكە لەماوەكانی ڕابردوو پەرلەمانتارانی كورد بەتایەت من و (دیلان غەفور) كە ئەویش نوێنەری كەركوكە چەندین نوسراومان ئاراستەی سەرۆكوەزیران كردووە بە دوورخستنەوەی پارێزگاری سەپێندراوی كەركوك.
ئاماژەی بەوەشكرد، تا ئێستا هەڵوێستێكی جدیمان لە پارتی نەبینیوە كە لە پێناو بەرژەوەندی یەكخستنی ماڵی كوردیدا بێت جگە لەوەی هەموو هەولێكی پارتی بۆ ئەوەبووە بەڕێككەوتنی ژێربەژێر لەگەڵ لایەنە عەرەب و توركمانەكان بگاتە ڕێككەوتن بۆ ئەوەی پۆستی پارێزگاری كەركوك بۆ یەكێتی نەبێت كە مافێكی یاسایی خۆیەتی و زۆرترین دەنگی بەدەستهێناوە.
ئەو نوێنەرەی كەركوك لە پەرلەمانی عێراق ئەوەشی خستەڕوو، یەكێتی زۆر سازشی لەسەر مافەكانی خۆی كردووە لەپێناو یەكخستنی ناوماڵی كوردی و هێنانەكایەی یەكدەنگی، بەڵام لەراستیدا ئەوەمان لە پارتی بەدینەكردووە و هیواخوازبووین پارتیش هاوشێوەی یەكێتی هەوڵ بۆ یەكخستنی ناوماڵی كورد بدایە بەڵام ئەوان لێك نزیكبوونەوەیان لە عەرەب و توركمان لە یەكێتی پێباشترە.
