لیژنه‌یه‌كى كۆمسیۆن له به‌غداوه دێته هه‌ولێر
هۆڵى به‌ڕێوه‌چوونى تیروپشك بۆ ناوى كاندیده‌كان | فۆتۆ: كۆمسیۆن
SNN
لیژنه‌یه‌كى كۆمسیۆنى باڵاى سه‌ربه‌خۆى هه‌ڵبژاردنه‌كانى عێراق به‌مه‌به‌ستى سه‌رپه‌رشتیكردنى كاره‌كانى هه‌ڵبژاردنى په‌رله‌مانى كوردستان سه‌ردانى هه‌رێمى كوردستان ده‌كات و بڕیاره له هه‌ولێره‌وه سه‌رپه‌رشتى هه‌ڵبژاردنه‌كان بكات.
به‌پێى كۆتا فه‌رمانى هه‌رێمى كه له‌لایه‌ن نێچیرڤان بارزانى، سه‌رۆكى هه‌رێمى كوردستان ده‌رچووه بڕیاره هه‌ڵبژاردنى په‌رله‌مانى كوردستان له به‌روارى 20ى تشرینى یه‌كه‌مى 2024 به‌ڕێوه‌بچێت.
به‌پێى زانیارییه‌كان، كۆمسیۆنى باڵاى سه‌ربه‌خۆى هه‌ڵبژاردنه‌كانى عێراق له به‌غداوه سه‌رپه‌رشتى پرۆسه‌كه ناكات، به‌ڵكو لیژنه‌یه‌كى تایبه‌ت ده‌نێرێته هه‌ولێر و لیژنه‌كه راسته‌وخۆ له هه‌ولێره‌وه سه‌رپه‌رشتى به‌ڕێوه‌چوونى هه‌ڵبژاردنه‌كه ده‌كه‌ن.
هاوكات، بڕیاره ئه‌مڕۆ شه‌ممه 10ى ئاب، كۆمسیۆن له شارى هه‌ولێر پرۆسه‌ى پێدانى ژماره به قه‌واره سیاسیه‌كان و كاندیده سه‌ربه‌خۆكان به‌ڕێوه‌به‌رێت له‌ڕێگه‌ى ئه‌نجامدانى تیروپشكه‌وه، به‌ڵام ئه‌و حزبانه ناگرێته‌وه كه پێشتر ژماره‌یان وه‌رگرتوو، واته ئه‌مڕۆ تیروپشكه‌كه بۆ پارتى دیموكراتى كوردستان و بزووتنه‌وه‌ى ئیسلامى كوردستان و ئەو لیستانەیە كه پێشتر نه خۆیان و نه كاندیده‌كانیان ژماره‌یان وه‌رنه‌گرتووه.
هەر بەپێی زانیارییەکان، بۆ هەر کورسییەکی پەرلەمانی کوردستانی 12 کاندید تیروپشکیان بۆ کراوە و کۆی گشتیی قەوارە سیاسییە تۆماركراوه‌كانیش لە کوردستاندا 136 قەوارەی سیاسیه.
