سبەینێ وەزیری دارایی عێراق لەپەرلەمان هۆكاری نەناردنی پارەی فەرمانبەرانی هەرێم یەكلایی دەكاتەوە

SNN-عەلی حەمە سەعید

ئەندامێكی لیژنەی دارایی عێراق ئاماژە بەوەدەكات، وابڕیارە سبەینێ سێ‌شەممە هەریەكە لە وەزیری دارایی و پلاندانی عێراق و پارێزگاری بانكی ناوەندی عێراق بێنە لیژنەی دارایی پەرلەمان، ئێمەش وەك نوێنەرانی كورد لە لیژنەی دارایی پرسیاری لەبارەی مووچەی فەرمانبەرانی هەرێم و چەند پرسێكی تر ئاراستە دەكەین.

دكتۆرە نەرمین مەعروف، ئەندامی لیژنەی دارایی پەرلەمانی عێراق بە SNNی ڕاگەیاند: لەسەرداوای ئێمە لە لیژنەی دارایی وابڕیارە سبەی سێ‌شەممە هەریەكە لە وەزیرانی دارایی پلاندانان و پارێزگاری بانكی ناوەندی عێراق بانگهێشتی لیژنەی دارایی عێراق كراون ئەوەش بەمەبەستی پرسیار كردن و وەرگرتنی زانیاری لەبارەی چەند پرسێكی تایبەت بە بواری دارایی.

ئاماژەی بەوەشكرد، ئێمە وەك نوێنەرانی كورد لە لیژنەی دارایی پرسیار ئاراستەی تەیف سامی دەكەن لەبارەی هۆكاری دواكەوتنی مووچەی فەرمانبەرانی هەرێمی كوردستان، بۆیە ئەگەر وەزیری دارایی عێراق سبەی ئامادەی لیژنەكەمان ببێت دەبێت هۆكاری نەناردنی پارەی مووچەی فەرمانبەران بۆ مانگی حەوت یەكلایی بكاتەوە.

ئەو ئەندامەی لیژنەی دارایی لە ئەنجومەنی نوێنەرانی عێراق ئەوەشی خستەڕوو، لەبارەی بابەتی نەبوونی پارەی كاش و چەند بابەتێكی دیكە گفتوگۆی لەگەڵ دەكەین، چونكە وەزارەتی دارایی عێراق خۆیان ئەوەیان بڵاوكردووەتەوە كە كێشەی پارەی نەختنینەیان نییە.