وەزیری دەرەوەی ئەمریکا بۆ سودانی: ئەرکی پاراستنی سەربازەکانمان لە ئەستۆی عێراقە
ئەنتۆنی بلینکن، وەزیری دەرەوەی ئەمریکا
SNN
وەزیری دەرەوەی ئەمریکا لە پەیوەندییەکی تەلەفونیدا بە سودانی راگەیاندووە، ئەرکی پاراستنی راوێژکارە سەربازییەکانمان لە ئەستۆی عێراقە و دەبێت لە هێرشی گرووپە چەکدارەکانی سەر بە ئێران بپارێزرێن.
وەزارەتی دەرەوەی ئەمریکا راگەیەنراوێکی بڵاوکردووەتەوە و ئاشکرایدەکات، ئەنتۆنی بلینکن، وەزیری دەرەوەی ئەمریکا پەیوەندیی تەلەفونی لەگەڵ محەمەد شیاع سودانی، سەرۆکوەزیرانی عێراق کردووە، ھەردوولا باسیان لە ھەوڵە دیپلۆماسییەکان بۆ سەقامگیری ناوچەکە و وەلانانی ئاڵۆزییەکان کردووە.
هەروەک لە راگەیەنراوەکەدا هاتووە، بلینکن ئاماژەی بە گرنگیی ئەرکی عێراق کردووە بۆ پاراستنی راوێژکارە سەربازییەکانی هاوپەیمانان لە هێرشەکانی سەر بە گرووپە چەکدارەکانی ئێران.
ھاوکات بلینکن جەختیکردووەتەوە لەسەر ئەوەی بەرپرسیارێتی پاراستنی ڕاوێژکارە سەربازییەکانی سەر بە ھاوپەیمانی نێودەوڵەتی لە ھێرشی گروپەکانی سەر بە ئێران خستە سەر عێراق، ھەردوولاش جەختیان کردەوە لەسەر بەردەوامیدان بە گفتوگۆکانیان سەبارەت بە ڕەوشی ناوچەکە و پتەوکردنی پەیوەندییەکانی ئەمریکا و عێراق.
ئەمە دووەم پەیوەندی تەلەفۆنی بلینکن و سوودانییە لەماوەی هەفتەی رابردوودا، رۆژی 4ی ئاب جارێکی تر پێکەوە پەیوەندی تەلەفونیان کردووە و لەبارەی گرژییەکانی ناوچەکە و پەیوەندیی هەردوولاوە گفتوگۆکراوە.
