یەكێتی مامۆستایان هەڵوێستی خۆیان لەسەر دواكەوتنی مووچە ڕاگەیاند

SNN-عەلی حەمە سەعید

جێگری سەرۆكی یەكێتی مامۆستایانی كوردستان ئاماژە بەوەدەكات، حكومەتی هەرێم بێباكە لە ئاست مافەكانی مامۆستایان و فەرمانبەرانی هەرێم، جەختیش دەكاتەوە كە ئەگەر پێش دەستپێكردنەوەی پرۆسەی خوێندن حكومەت دوو مووچە دابەشنەكات ئەوا بژاردەی بایكۆت یەكێك دەبێت لە بژاردەكان و حكومەتیش بەرپرس دەبێت لەو دۆخە.

عەتا ئەحمەد، جێگری سەرۆكی یەكێتی مامۆستایانی كوردستان بە SNNی ڕاگەیاند: ئەو دۆخەی ئێستا بەسەر مامۆستایان و فەرمانبەرانی هەرێم هاتووە حكومەتی هەرێم لێی بەرپرسە، چونكە ئەوە كۆتایی بە وەرزی هاوین هات مامۆستایان و فەرمانبەران بەبێ‌ مووچە ئەو وەرزەیان بەڕێكرد، بۆیە مامۆستایان مافی خۆیانە داوای مووچە بكەن، ساڵی رابردووش بەهەمان شێوەی ئەمساڵ بڕیاری بایكۆت درا و ئێمەش پشتگیریمان كردوون.

ئاماژەی بەوەشكرد، ئەگەر تاپێش دەستپێكردنەوەی پرۆسەی خوێندنی ئەمساڵ مووچەی مانگەكانی حەوت و هەشت دابەش نەكرێت، ئەوا بەدڵنیاییەوە مامۆستایانی ناڕازی مافی خۆیانە بایكۆت بكەن، یەكێتیی مامۆستایانیش پشتگیرییان دەكات و لەوبارەیەوە هەڵوێستی دەبێت.

جێگری سەرۆكی یەكێتی مامۆستایانی كوردستان ئەوەشی خستەڕوو، بژاردەكانی ڕاگەیاندنی بایكۆت لەلایەن مامۆستایانەوە بەهۆی دواكەوتنی مووچەوە یەكێك دەبێت لە بژاردەكان، ئەگەر بڕیارێكی لەو جۆرەش بدرێت ئەوا حكومەتی هەرێم لێی بەرپرس دەبێت.