وەزارەتی سامانە سروشتییەکان: ئامادەکاری بۆ دابەشکردنی نەوتی سپی و دابەزاندنی نرخی بەنزین دەستیپێکرد

SNN-

وەزارەتی سامانە سروشتییەکانی هەرێمی کوردستان لە راگەیەندراوێکدا بڵاویکردەوە، بە ئامادەبوون کەمال محەمەد ساڵح وەزیری سامانە سروشتییەکان کۆبوونەوەیەکی فراوان لەبارەی ئامادەکاری بۆ دابەشکردنی نەوتی سپی و دابەزاندنی نرخی بەنزین دەستیپێکرد.

لە راگەیەندراوەکەدا هاتووە، وەزارەتی سامانە سروشتییەکان ئامادەکارییەکانی دەستپێکرد تاوەکو بەمنزیکانە و سەرەتا لە ناوچە شاخاوییەکان دەست بە دابەشکردنی نەوتی سپیی پاڵپشتیکراوی حکومەتی هەرێم بکرێت.

وەزارەتەکە دەشڵێت: تەوەرێکی دیکەی کۆبوونەوەکە تایبەت بوو بە چۆنیەتی داشکاندنی نرخی بەنزینی جۆری نۆرماڵ و هاوردەکردنی بەنزینی زیاتری بازرگانی و دەست بە هەنگاوەکانی پرۆسەکە دەکرێت.

ئاماژەی بەوەشکردووە، هەر لەو کۆبوونەوەیەدا بڕیار درا وەفدێکی وەزارەت سەردانی وەزارەتی نەوتی عێراقی فیدراڵ بکات، بۆ دیاریکردن و وەرگرتنی بەشی هەرێم لە نەوتی سپی و بەنزین و کۆمەڵێک پرسی پەیوەندداری دیکە.