ناكۆییە ناوخۆییەكانی بزوتنەوەی گۆڕان پەرەدەسەنن و ناتوانن ڕێكخەری گشتی هەڵبژێرن

SNN-عەلی حەمە سەعید

هەرچەندە بەگوێرەی ڕاگەیەندراوێكی پێشووتری بزوتنەوەی گۆڕان دەبوو ئەمڕۆ ئەندامانی نوێی خانەی ڕاپەڕاندنی بزوتنەوەی گۆڕان هەڵبژێردرانایە، بەڵام بەهۆی دروستبوونی گرژی و ناكۆكی لەنێوان دووباڵی ناو ئەو بزوتنەوەیە نەتواندرا ئەو كارە بكرێت و هاوكات هەڵبژاردنی ڕێكخەری گشتیش دواخراوە.

بەگویرەی ئەو زانیارییانەی كە لەسەرچاوەیەكی ناو كۆبوونەوەكەی ئەمڕۆی بزوتنەوەی گۆڕان بە SNNدراون ئەوە خراوەتەڕوو، هەرچەندە وابڕیاربوو كە ئەمڕۆ هەڵبژاردن بۆ دیاركردنی ئەندامانی خانەی ڕاپەڕاندن بكرێت، بەڵام لەناو ئەندامانی جڤاتی نشتیمانی و جڤاتی گشتی ناكۆكی و تەنانە گرژیش دروست بوو، بەو هۆیشەوە پرۆسەكە ئەنجامنەدرا و دواخرا بۆ كاتیكی نادیار.

ئاماژەی بەوەشكرد، ئەوەی بووەهۆی دروستبوونی گرژی ناكۆكی بوو لە نێوان دووباڵی ناو بزوتنەوەی گۆڕان بەسەرۆكایەتی (عومەری سەیدعەلی) كە ئێستا ڕێكخەری گشتیە لەگەڵ باڵێكی دیككە كە (چیا و نما)ی نەوشیروان مستەفای دامەزرێنەری بزوتنەوەی گۆڕان سەرۆكایەتی دەكەن، هاوكات باڵی كوڕانی نەوشیروان مستەفا لەناو ئەندامانی جڤاتی نشتیمانی و جڤاتی گشتی زۆرینەن ئەمەش لەلایەن باڵەكەی عومەری سەید عەلییەوە قبوڵكراو نییە و گرفتیان بۆ پرۆسەكە دروستكردووە.

هەر لە زانیارییەكانی SNNئەوەشهاتووە، كە بەهۆی ئەوەی ئەمڕۆ نەتواندرا هەڵبژاردن بۆ ئەندامانی خانەی ڕاپڕاندن بكرێت بۆیە هەڵبژاردنی ڕێكخەری گشتیش كە دەبوو لە حەوتی ئەم مانگە بەڕێوەبچێت دوادەخرێت، هاوكات ڕێكخەری گشتی ئێستا لیدوانی لەسەرجەم ئەندامانی جڤات و نشتیمانی گۆڕان قەدەغەكردووە بەوەی كە نابێت زانیاری بدەنە ڕاگەیاندنەكان لەسەر ئەو بابەتە بە وتەبێژی بزووتنەوەكەشەوە.