سیستمی باج لە نێوان عێراق و ھەرێمی کوردستان رێکخرا

SNN-
دەستەی گشتی باجی عێراق ڕێککەوتنی ھاوبەشی نێوان ھەولێر و بەغدادی بۆ یەکخستنی کاری باج پەسەندکرد و بڕیارە لە ھەفتەی داھاتووەوە کاری پێبکرێت.

دوای ئەوەی لەچەند رۆژی رابردوودا وەفدی وەزاری عێراق بۆ کاروباری ئابوری سەردانی ھەولێری کرد و ماوەی دوو رۆژ لەگەڵ ئەنجوومەنی وەزارەی ئابوری هەرێمی کوردستان کۆبوونەوە و تێیدا باس لە بابەتەکانی باج و گومرگ و دەروازە سنورییەکان کرا تا ھەرێمیش ھاوشێوەی عێراق کار بە سیستەمی ئەسکیودا بکات، کە لەو رێگەیەوە دەتوانرێت جوڵەی دەروازەکان و باج رێکبخرێت.

دەستەی گشتی باجی عیراق لە ڕاگەیەندراوێکدا بڵاویکردووەتەوە کە وەزیرانی دارایی لە حکومەتی فیدراڵی و ھەرێمی کوردستان ڕێکەوتنێکی ھاوبەشیان بۆ یەکخستنی ڕێکارەکانی باج و کارکردن لە سەرجەم لقەکانی باج لە عێراق پەسەند کردووە ، کە بڕیارە لە ھەفتەی داھاتووەوە کاری پێبکرێت.

بە گوێرەی راگەیەندراوەکە رێککەوتن لەسەر ئەوە کراوە کە زانکۆ و پەیمانگا ئەھلییەکان بخرێنە سەر سیستمی ژمێریاری باج.