لیژنەی دارایی پەرلەمانی عێراق دێنە هەرێم و چاودێری ئەو ڕێككەوتنە دەكەن لەنێوان هەولێرو بەغدا كراوە

SNN-عەلی حەمە سەعید

دوای ئەوەی هەفتەی ڕابردوو شاندی باڵای ئەنجومەنی ئابووری عێراق بەسەردانیكی دوو ڕۆژە هاتنە هەرێمی كوردستان و لەگەڵ ئەنجومەنی ئابووری هەرێم كۆبوونەوە و چەند ڕێككەوتنێك كران لەبارەی كۆتایی هێنان بە گرفتەكانی مووچە، وابڕیارە لەم هەفتەیەشدا شاندێكی لیژنەی دارایی پەرلەمانی عێراق بێنە هەرێمی كوردستان.

د. نەرمین مەعروف، ئەندامی لیژنەی دارایی لە ئەنجومەنی نوێنەرانی عێراق بە SNNی ڕاگەیاند: بەمەبەستی چاودێریكردن و بەدواداچوونی ئەو ڕێككەوتن و لێکتێگەیشتن كە لەنێوان هەردوو ئەنجومەنی ئابوری عێراق و هەرێمی كوردستان كراوە لەبارەی گرفتەكانی مووچە و چەند بابەتێكی دیكەی پەیوەست بە دارایی، تا كۆتایی ئەم هەفتەیە شاندێك لە لیژنەی دارایی پەرلەمانی عێراقەوە دێینە هەرێمی كوردستان.

ئاماژەی بەوەشكرد، لەسەردانەكەی لیژنەی دارایی عێراق كە بەسرۆكایەتی سەرۆكی لیژنەی دارایی دەبێت، لەگەڵ بەرپرسانی هەرێمی كوردستان بەتایبەت وەزیری دارایی و چەند وەزیرێكی دیكە كۆدەبینەوە و لەگەڵیاندا گفتوگۆدەكەین لەبارەی چۆنییەتی جێبەجێكردنی ئەو ڕێككەوتنانەی كە لەنێوان هەولێرو بەغدا كراون لەبارەی دۆسییە ئابورییەكان و هەروەها چارەسەركردنی گرفتەكانی مووچە بەتایبەت لیستی مووچەی فەرمانبەران.

ئەو ئەندامەی لیژنەی دارایی لە پەرلەمانی عێراق ئەوەشی خستەڕوو، ئێمە هیچ ڕێككەوتنێك لەگەڵ حكومەتی هەرێم واژۆ ناكەین چونكە ئەوە كاری ئێمە نییە بەڵكوو هەردوو حكومەتی عێراق و هەرێمی كوردستان دەتوانن ڕێككەوتن واژۆ بكەن، ئێمە لە پەرلەمان چاودێر دەبین بەسەریانەوە بۆ ئەوەی هەردوولا پابەند بە ڕێككەوتنەكانەوە و نەبنە گرفت بۆ فەرمانبەران.