ئەندامێكی لیژنەی دارایی: نەبوونی پارەی نەختینە دوورە لە ڕاستییەوە

SNN-عەلی حەمە سەعید

ئەندامێكی لیژنەی دارایی لە ئەنجومەنی نوێنەرانی عێراق جەخت لەوەدەكاتەوە كە ئەگەر نرخی نەوتیش بۆ نزمترین ئاستی خۆی دابەزێت دابەشكردنی مووچەی ئەمساڵ و ساڵی داهاتووش هیچ گرفتێكی بۆ دروست نابێت، هاوكات ئەو دەنگۆیانەش ڕەتدەكاتەوە كە باس لە نەبوونی پارەی نەختینە دەكەن بۆ دابەشكردنی مووچەی فەرمانبەران بە عێراق و هەرێمی كوردستانەوە.

د.جەمال كۆچەر، ئەندامی لیژنەی دارایی لە ئەنجومەنی نوێنەرانی عێراق بە SNNی ڕاگەیاند: بەگوێرەی پرۆژەیاسای بودجەی گشتی كە لە پەرلەمان بۆ ئەمساڵ و ساڵی داهاتووش دەنگی لەسەر دراوە و پەسەندكراوە، دابینكردنی مووچەی فەرمانبەران بەعێراق و هەرێمی كوردستانەوە گەرەنتی كراوە و هیچ گرفتێك بۆ مووچە نایەتە ئاراوە.

ئاماژەی بەوەشكرد، ئەودەنگۆیانەی باس لە نەبوونی پارەی نەختینە دەكەنەوە بۆ مووچەی فەرمانبەران ناڕاستن چونكە وەزارەتی دارایی بۆخۆیان ڕوونكردنەوەیان داوە و جەختیان لەوەكردووەتەوە كە هیچ كێشەیەكیان نییە لە دابینكردنی پارەی مووچەی فەرمانبەران تەنانەت ئەگەر نرخی نەوتیش زۆر دابەزێت.

ئەو ئەندامەی لیژنەی دارایی لە ئەنجومەنی نوێنەرانی عێراق ئەوەشی خستەڕوو، پێشتر پارەی مووچەی فەرمانبەران گەرەنتی كراوە، هاوكات حكومەتیش یەدەگێكی زۆری نەختینەی لەبەردەستدایە و دەتوانیت لە كاتی نائاساییدا سوودی لێ ببینێت.