وەزیری ناوخۆ: پارێزگاکان سەرپشکن لە جێبەجێکردنی ئاسانکاری

SNN

رێبەر ئەحمەد وەزیری ناوخۆی هەرێم رایگەیاند: قەدەغەی هاتووچۆ درێژناکرێتەوە، هاوکات دەسەڵات دراوەتە پارێزگاکان و ئیدارە سەربەخۆکان، کە ئاسانکاری رابگەیەنن.

رێبەر ئەحمەد لە کۆنفرانسێکی رۆژنامەنوسیدا راشیگەیاند: وەزارەتی ناوخۆ هیچ پلانێکی نیە بۆ درێژکردنەوەی قەدەغەی هاتووچۆ، وتیشی هەموو پارێزگا و ئیدارە سەربەخۆکان داوایانکردووە دەسەڵاتی زیاتریان پێبدرێت لەوەی ئاسانکاری بۆ ژیانی هاووڵاتیان رابگەیەنن، ئێمەش داوایان لێدەکەین بەرپرسیارێتی سەلامەتی هاووڵاتیان بگرنە ئەستۆیان و سزای توندی ئەو هاووڵاتیانە بدەن کە سەرپێچی رێکارە تەندروستییەکان دەکەن.

وەزیری ناوخۆ راشیگەیاند: پێویستە رەچاوی ئەوە بکرێت کە ئێستا لە وەرزی دروێنە و کشتوکاڵداین و نابێت بەروبومی خەڵک لە کشتوکاڵ بفەوتێت، هاوکات زیان بە سەوزەفرۆش و نانەواخانە و کاسبکاران نەگات.

ئاماژەی بەوەشکرد: قەدەغەی هاتووچۆ لە نێوان پارێزگا و شار و شارۆچکەکان بەردەوام دەبێت، هاوکات لە نێوان هەرێم و ناوچەکانی دیکەی عێراقیشدا بەردەوام دەبێت.

ئاماژەی بەوەشکرد: “بەداخەوە هاووڵاتیان لە ماوەی رابردوودا پابەندی رێکارەکان نەبووە، ئەگەر لێپێچینەوە لە سەرپێچیکاران نەکرێت پێشبینی دەکەین لە ماوەیەکی کورتدا بگەینە قۆناغێکی زۆر مەترسیدار”.