عێراق داوای لیستێكی دیكە لەهەرێم دەكات و ناردنی پارەش بۆ هەفتەی داهاتوو دواكەوت

SNN-عەلی حەمە سەعید

ئەگەرچی وابڕیاربوو لەم هەفتەیەدا بەغدا بڕی زیاتر لە 240 ملیار دینار وەك مووچەی تەواوكاری بۆ مووچەی مانگی هەشت ڕەوانە بكات، بەڵام وەزارەتی دارایی عێراق داواكارییەكی دیكەی ئاراستەی هەرێم كردووە و داوایكردووە لیستی گۆرانكاری مووچەی بۆ ڕەوانە بكرێت پاشان پارە ڕەوانەی هەرێم دەكات.

بەگوێرەی ئەو زانیارییانەی كە لە بەرپرسێكی وەزارەتی دارایی هەرێم بە SNNدراون ئەوەخراوەتەڕوو، ئێمە چاوەڕێبووین كە بە ئەگەرێكی زۆر لەم هەفتەیەدا پارەی تەواوكاری ڕەوانە بكرێت و هەر لەم هەفتەیەدا مووچە دابەشبكەین، بەڵام لەلایەن وەزارەتی دارایی عێراق داواكارییەكمان ئاڕاستەكراوە بە ناردنی لیستی گۆڕانكاری لە مووچەی فەرمانبەران.

ئاماژەی بەوەشكرد، لیستی گۆڕانكاری لە مووچە ئەو لیستەیە كە مانگانە بەهۆی بەستنی سەرەمووچە یان دەرماڵە یاخود گۆڕانكاری لە بڕوانامەی فەرمانبەران گۆڕانكاری بەسەر بڕی مووچەی فەرمانبەران دێت، بەجۆرێك بەهۆی ئەو گۆڕانكارییانەوە بڕی مووچەكانیان زیاد دەكات، ئەوەش كارێكی ئاساییە، بەڵام بەغدا داوایكردووە بە لیستێك ئەو گۆڕانكارییانەیان بۆ ڕەوانە بكەین.

ئەو بەرپرسەی وەزارەتی دارایی هەرێم ئەوەشی خستەڕوو، لەدوێنێوە سەرجەم یەكە ژمێریاییەكانی سەر بە وەزارەتەكان ئاگاداركراونەتەوە كە بەلیستێك ئەو گۆڕانكارییانەیان بۆ ڕەوانە بكەن ب‌و ئەوەی ئەوانیش ئاراستەی بەغدای بكەن، بۆیە بەهەموو ئەگەرێك ناردنی پارە و دابەشكردنی مووچە دەكەوێتە هەفتەی داهاتوو ئەگەر بەغدا داواكاری دیكەی نەبێت.