سوپای ئیسرائیل: بەرپرسێکی دیکەی حیزبوڵڵامان کوشت

ئەمڕۆ سێشەممە سوپای ئیسرائیل کوژرانی بەرپرسێکی دیکەی حیزبوڵای لوبنانی راگەیاند.

سوپای ئیسرائیل لە بەیاننامەیەکدا رایگەیاند، فڕۆکە جەنگییەکانیان هەڵمەتێکی وردیان لە بەیروت ئەنجامداوە و چەندین ئامانجیان پێکاوەو لەو هەڵمەتەدا سوهەیل حسێن حوسێنی، بەرپرسی ئەرکانی گشتی حیزبوڵڵای لوبنان کوژراوە.

لە بەیاننامەکەدا هاتووە کە حوسێنی ئەندامی ” ئەنجومەنی جیهاد” بوە کە بەرزترین دەسەڵاتی سەربازی حیزبوڵڵا بوە، هەروەها بەرپرس بوە لە گواستنەوەی کەلوپەلە سەربازییەکان لە نێوان حیزبوڵڵا و ئێران.

سوپای ئیسرائیل دەشڵێت:” ئەو بەرپرسەی حیزبوڵڵا کە کوژراوە، کاروباری لۆجستی رێکخراوەکە و هەستیارترین پلانەکانی جەنگ-ی داڕشتوە، لەوانە ئەنجامدانی ئۆپەراسیۆن لە دژی ئیسرائیل لە خاکی لوبنان و سوریاوە.