“هەژماری من هیچ گەرەنتییەكی بۆ مووچەخۆران تێدا نییە و حكومەتی هەرێم كێشە بۆ تەوتین دروست دەكات”
SNN-عەلی حەمەسەعید
شارەزایەكی بواری دارایی و بانكی ئاماژەبەوەدەكات، “هەژماری من” هیچ گەرەنتییەكی بۆ مووچەخۆران تێدا نییە و هەركاتێك بانكەكانی پرۆژەكە ئیفلاسیان كرد بە زیانی مووچەخۆران كۆتایی دێت، چونكە زۆرینەی بانكەكان ئەهلین و دژی بڕیارەكەی دادگای فیدراڵیشن، هاوكات حكومەتی هەرێم كێشە بۆ تەوتین دروست دەكات
جەبار گۆران، شارەزای بواری دارایی و بانكی بەSNNی ڕاگەیاند: هۆكاری نەناردن و دواكەوتنی مووچەی مووچەخۆرانی هەرێم لە چەند مانگی رابردوودا تەنها بۆ هەژماری من دەگەڕێتەوە كە حكومەتی هەرێم بە بیانوی جیاجیا كێشە بۆ تەوتین دروست دەكات، لەكاتێكدا تەوتین گەرەنتی زیاترە و مووچەخۆران دەتوانن سوودمەندبن لە پێشینەكان كە لەلایەن حكومەتی عیراقەوە دەدرێت بە مووچەخۆران،
ئاماژەی بەوەشكرد، بەشێكی زۆر لەو بانكانەی لە (هەژماری من)دا هەن، بانكی شەخسین و هەركاتێك ئیفلاس بكات بە زیانی مووچەخۆران كۆتایی دێت، بۆیە گرنگە بە هیچ شێوەیەك مووچەخۆران بەشداری لە هەژماری من نەكەن، لە بەرامبەردا مووچەخۆران پێویستە تەوتین لە یەكێك لە بانكە حكومییەكانی عێراق بكەن، چونكە حكومەتی عیراق گەرەنتی مووچەكانیان دەكات.
ئەو شارەزایەی بواری دارایی و بانكی ئەوەشی خستەڕوو، پێویستە مووچەخۆران فشار بكەن بۆئەوەی كۆتایی بە ئەو سیستەمە بانكییە چەوتە بەناوی هەژماری من بهێندرێت، بۆئەوەی چیتر خێروبێری ئەم وڵاتە لەژێر ناوێكی تردا نەچێتە ناو گیرفانی بنەماڵەیەك، هەر لەو چوارچێوەیەشدایە كە سەرۆكی یەكێتیی نیشتمانیی كوردستان دژی وەستاوەتەوە و داوا لە مووچەخۆران دەكات لەبری هەژماری من، بچن تەوتین لە یەكێك لە بانكە حكومییەكانی عیراق بكەن.
