یەكێتی لەسلێمانی و هەڵەبجە دەنگی یەكەمە و لەهەولێریش دووەمە

SNN

بەپێی ئەنجامە بەراییەكانی هەڵبژاردنی خولی شەشەمی پەرلەمانی كوردستان كە دوێنی یەك شەممە لەسەرتاسەری هەرێمی كوردستان بەڕێوەچوو، یەكێتی نیشتمانی كوردستان سەركەوتنی گەورەی بەدەستهێناوە و رێژەی دەنگ و كورسییەكانی لەپەرلەمانی كوردستان زیادیكردووە.

یەكێتیی نیشتمانیی كوردستان لەسنووری پارێزگای سلێمانی بەجیاوازییەكی زۆر پێش ركابەرەكانی كەوتووە و لەزۆربەی بنكە و وێستگەكان دوو هێندەی پارتەكانی تر دەنگی هێناوە، هەروەها بەراورد بەهەڵبژاردنی ساڵی 2021، لەم هەڵبژاردنەدا یەكێتی نیشتمانی كوردستان دەنگەكانی زۆر زیادیكردووە، لە گەرمیان و راپەڕین و پێنجوێن و هەڵەبجەش براوەی یەكەم بووە ،زۆر بەی كورسییەكانی ئەو ناوچانە مسۆگەر كردووە.

لەپارێزگای هەڵەبجەش یەكێتی نیشتمانی كوردستان دوو كورسی لەكۆی سێ كورسی پارێزگاكە مسۆگەر كردووە، هاوكات لەم هەڵبژاردنەدا لەپارێزگای هەولێریش یەكێتی نیشتمانی كوردستان سەركەوتنی گەورەی بەدەستهێناوە و لەسەر ئاستی پارێزگاكە وەك دووەم هێز ركابەری پارتی دەكات و لەپارێزگای دهۆكیش كورسیەكی مسۆگەر كردووە