پێدانی سوپاس و پاداشت بەكارمەندانی كۆمیسیۆن وەك هەڵبژاردنەكانی پێشوو دواناكەوێت

SNN-عەلی حەمە سەعید

دوای كۆتایی هاتنی پرۆسەی هەڵبژاردنی پەرلەمانی كوردستان، بەرپرسانی كۆمیسیۆن جەخت لەوەدەكەنەوە كە میكانیزمێكی گونجاو دەگرنە بەر بۆ ئەوەی لە زوترین كاتدا پاداشتی دارایی و سوپاسی حكومەت بدرێتە كارمەندانی كۆمیسیۆن كە لەڕۆژانی هەڵبژاردن ئەركیان پێسپێردراوە.

دادوەرعامر موسا، سەرۆكی لیژنەی ناوەندی بۆ بەڕێوەبردنی هەڵبژاردن بە SNNی راگەیاند: لەگەڵ ئەندامانی ئەنجومەنی كۆمیسیاران بابەتەكانی پەیوەست بە ڕاگەیاندنی كۆتایی ئەنجامەكانی هەڵبژاردن و چارەسەركردنی سكاڵاكانی پەیوەست بە هەڵبژاردن و دانانی میكانیزمێك بۆ دابەشكردنی پاداشت بەسەر كارمەندانی ڕۆژی دەنگدان تاوتوێی كردووە، ئەوەش بەمەبەستی ئەوەی وەك هەڵبژاردنەكانی ڕابردوو پێدانی پاداشت و سوپاس بە فەرمانبەرانی ڕۆژی هەڵبژاردن دوانەكەوێت.

ئاماژەی بەوەشكرد، ئامادەكردنی لیستی ناوی ستافی دەنگدان لە توێژی فەرمانبەرانی حكومەت بۆ بەدەستهێنانی نامەی سوپاسگوزاری و پێزانین بۆیان لەلایەن سەرۆكایەتی حكومەتی هەرێم و هاوكات پێدانی پاداشتی دارایی یەكێك دەبێت لەكارەكانمان، هاوكات پێدانی پاداشتی دارایی بەو فەرمانبەرانەی كە دانەمەزراون لەداموودەزگا حكومییەكان.

بەگوێرەی ئەو گرێبەستەی كە لەنێوان فەرمانبەرانی ڕۆژی هەڵبژاردن و كۆمیسیۆن واژۆكراوە، ئەو فەرمانبەرانی كە دامەزراون لە دامودەزگا حكومییەكان و مووچەیان هەیە تەنها بڕی 150 هەزار دینار و پێدانی سوپاسێك و هاوكات ئەو فەرمانبەرانەی ڕۆژی هەڵبژاردنیش كە دانەمەزراون و هیچ مووچەیەكیان نییە بڕی 250 هەزار دیناریان پێدەدرێت.