وادەی دابەشكردنی مووچەی مانگی 10 راگەیەندرا

SNN-عەلی حەمە سەعید

تا ئەمڕۆ وەزارەتی دارایی هەرێم لیستی مووچەی مانگی 10ی فەرمانبەرانی هەرێمی ڕەوانەی بەغدا نەكردووە، هاوكات وابڕیارە كە لەهەفتەی داهاتوو وەزارەتی دارایی هەرێم لیستی مووچە ڕەوانەی بەغدا بكات و ئەگەر هیچ گرفتێك لە لیستەكەدا نەبێت ئەوا بەغدا زووتر پارە دەنیرێت و تا كۆتایی ئەم مانگە دەستدەكرێت بە دابەشكردنی مووچەی مانگی 10.

بەگویرەی ئەو زانیارییانەی كە لە بەرپرسێكی وەزارەتی دارایی هەرێم بە SNNدراون ئەوەخراوەتەڕوو، تا ئەمڕۆ لیستی مووچەی مانگی 10ی فەرمانبەرانی هەرێم ڕەوانەی بەغدا نەكراوە، ئەوەش بەهۆی ئەوەی وەزارەتی دارایی دەیەوێت بەجۆرێك لیستی مووچە ئامادە بكات كە لەلایەن وەزارەتی دارایی عێراقەوە داوایلێكراوە بۆ ئەوەی ڕاستەوخۆ پەسەند بكرێت.

ئاماژەی بەوەشكرد، بەدڵنیاییەوە هەفتەی داهاتوو لیستی مووچەی مانگی 10 ئامادە دەكرێت و ئەگەر بەغدا هیچ تێبینییەكی لەسەر لیستەكە نەبێت ئەوا لەگەڵ كۆتایی هاتن بە پارەداركردنی مووچەی وەزارەتەكانی عێراق ڕاستەوخۆ پارەی مووچەی مانگی 10ی فەرمانبەرانی هەرێمیش ڕەوانە دەكرێت.

ئەو بەرپرسەی وەزارەتی دارایی هەرێم ئەوەشی خستەڕوو، هەموو ئەگەرەكان بەو ئاراستەیەن كە تا كۆتایی ئەم مانگە بەغدا پارەی مووچەی مانگی 10ی فەرمانبەران ڕەوانە بكات و ئێمەش ڕاستەوخۆ دەستبكەین بەدابەشكردنی.