سبەینێ بە بەشداری 700 جوتیار و خاوەنكار دەیەمین فێستیڤاڵی هەنار لە پارێزگای هەڵەبجە بەڕێوەدەچێت
فێستیڤاڵی هەنار فۆتۆ-عەلی حەمە سەعید
SNN-عەلی حەمە سەعید
بۆساڵی دەیەم لەسەر یەك وابڕیارە سبەی پێنجشەممە لە 600 كەپر و بە نمایشكردنی بەرهەمی 700 جوتیار و خاوەنكاری سنوری پارێزگای هەڵەبجە دەیەم فێستیڤاڵی هەنار لە پارێزگای هەڵەبجە بەڕێوەدەچێت و بۆماوەی سێ ڕۆژ بەردەوامی دەبێت.
ستار مەحموود، بەڕێوەبەری گشتی كشتوكاڵی هەڵەبجە بە SNNی ڕاگەیاند: سەرجەم ئامادەكارییەكان بۆ ئەنجامدانی دەیەم فێستیڤاڵی هەنار لە پارێزگای هەڵەبجە بە كۆتا گەیشتوون، بۆ ئەومەبەستەش سبەی پێنجشەممە لە كاژێر 10:00ی بەیانی كارەكانی دەیەمین فێستیڤاڵی هەنار لە پارێزگای هەڵەبجە دەستپێدەكات و بۆماوەی سێ ڕۆژ بەردەوامی دەبێت.
ئاماژەی بەوەشكرد، لە فێستیڤاڵەكەی ئەمساڵدا، 600 كەپر بۆ زیاتر لە 700 جووتیار و خاوەن كار و باخەوان، خاوەن كارە دەستییەكان و بەشداربووانی دیكە ئامادە كراون، بۆیە پێشبینی دەكەین ئەم ساڵ ژمارەی گەشتیار و كڕیار زیاتر بێت، چونكە ئامادەكارییەكی زۆر باشمان كردووە بەراورد بە فێستیڤاڵەكانی ساڵانی ڕابردوو، هاوكات لە فێستیڤاڵەكەدا هەناری هەڵەبجە و هەورامان، هەنگوینی ناوچەكە، دۆشاو، مێوژ، گوێزی هەورامان، خواردنە كوردەوارییەكان، بەرهەمە كولتوورییەكان و كارە دەستییەكانی خانمان دەخرێنەڕوو.
بەڕێوەبەری گشتی كشتوكاڵی هەڵەبجە ئەوەشی خستەڕوو، جگە لە خستنەڕووی بەرهەمی جوتیاران و خاوەنكارانی سنورەكە، ئەمساڵ بۆیەكەمجارە كە هەر لەو ڤیستیڤاڵەدا گفتوگۆی زانستی سەبارەت بە چۆنێتی بەرهەمهێنان و بەبازاڕكردنی هەناربە بەشداری كەسانی پسپۆڕو شارەزا بەڕێوە دەچێت.
