لە سلێمانی زەوی بەسەر سەدان کەسدا دابەش دەکرێت

SNN-عەلی حەمە سەعید

بەڕێوەبەری گشتی شەهیدان و ئەنفالكراوانی سلێمانی ئاشكرایدەكات كە سەرجەم ئەو كەسانەی كە فەرمانی ئەنجومەنی وەزیرانیان هەیە لە هەفتەی داهاتوو زەوییان بەسەردا دابەشدەكرێت كە ژمارەیان 500 كەس دەبێت و ڕووبەری ئەو زەوییانەشی پێیان دەدرێت 200 مەتر دەبێت.

ئەدیب لەتیف، بەڕێوەبەری گشتی كاروباری شەهیدان و ئەنفالكراوانی سلێمانی بە SNNی راگەیاند: لەئێستادا ئامادەكاری دەكرێت بۆ پێدانی زەوی بەكەسوكاری شەهیداندا و دوای رێكخستنی ناوەكانی ئەو كەسانەی سوودمەند دەبن، هەفتەی ئایندە دەست بەدابەشكردنی زەوییەكان دەكرێت، كە ژمارەیان نزیكەی 500 كەسە لەوارسی شەهیدان.

ئاماژەی بەوەشكرد، دابەشكردنی زەوی بە شێوەی تیروپشك و خاڵبەندی دەگرێتەوە و لەهەفتەی داهاتوو دابەشكردنی بەسەر ئەو كەسانە دەبێت كە پێشتر فەرمانی ئەنجومەنی وەزیرانیان بۆ دەركراوە، بەڵام بەهۆی نەبوونی زەوییەوە، تائێستا وەریان نەگرتووە و دابەشكردنەكەی دواكەوتووە.

بەڕێوەبەری گشتی كاروباری شەهیدان و ئەنفالكراوانی سلێمانی ئەوەشی خستەڕوو، لە بەڕێوەبەرایەتیی گشتی شەهیدان و ئەنفالكراوانی سلێمانی 43 هەزار مووچەخۆر هەیە و تائێستا 22 هەزار پارچە زەوی بە كەسوكاری شەهیدان و زیندانیانی سیاسی دابەشكراوە، رووبەری ئەو زەوییەی بۆ هەر فەرمانبەرێك تەرخان دەكرێت 200 مەتر دووجا دەبێت، ئەوەش بەگوێرەی ساڵانی خزمەت و ژمارەی ئەندامانی خێزان و شوێنی نیشتەجێبوون زەوییەكان دابەشدەكرێن.