“فشارەکانی ترەمپ بۆ سەر ئێران زیاد دەبێت”

SNN

بەگوێرەی سەرچاوەیەکی نزیک لە دۆناڵد ترەمپ، لەگەڵ بردنەوەی لە پۆستی سەرۆکی ئەمریکا فشارەکانی ترەمپ بۆ سەر ئێران زیاتر دەبێت، هەر بۆیە ئێرانیش داوا دەکات ئیدارەی ئەمریکا بە سیاستەکانی پێشوویدا بچێتەوە.

ئەمڕۆ یەکشەممە 10ی تشرینی دووەم، رۆژنامەی وۆڵستریت جۆرناڵی ئەمریکی لە زاری سەرچاوەیەكی نزیك لە دۆناڵد ترەمپ، سەرۆكی هەڵبژێردراوی ئەمریكا رایگەیاندووە، فشارەكانی واشنتۆن دژی تاران لەسەر دەستی ترەمپ زیاتر دەبێت.

ئاماژەی بەوەکردووە، ترەمپ بۆ لاوازكردنی گروپەكانی سەر بە ئێران رێگریی لە فرۆشتنی نەوتی زیاتری وڵاتەكەی دەکات، هاوکات فشارەكانیشی بۆسەر بەرنامەی ئەتۆمیی ئێران بۆ بەرزترین ئاست زیاتر بكات.

ئەمە لە کاتێکدایە، پێشتر محەمەد جەواد زەریف، راوێژكاریی ستراتیژیی سەرۆك كۆماری ئێران داوای لە دۆناڵد ترەمپ كردبوو فشارەكانی دژی تاران كەمبكاتەوە بۆ ئەوەی ئێران پابەندنی رێككەوتنی ئەتۆمی بێت.